Joniston (tanga’) pinopoimagon Karnival Krismas Inanam. Id sampaping disio i Pastor Bios.
KOTA KINABALU: Sabah nuru’ do tumilombus momogompi’ nubasanan mogipapantang di poinharo mantad nogi’ sumili ombitanan pogititimbangan id ugama’ om tinaru, ka di Monguhup Montiri kumaa Boyoon Montiri, Datuk Joniston Bangkkuai.
minoboros isio, kaantakan karaaton i kopohompit do amu’ kopogititimbangan tinaru om ugama i naantakan doid pipiro bohogian pomogunan apatut silihon kopoingatan kokomoi koponsolon momogompi’ piuludan id nayatan nokoiyonon.
“Soira sosonginan mogigiyon amu’ kopongulud pisuayan miampai poinponu’ pamantangan, gama-gama’ dilo’ kaanu sumili do araat kopio.
“Sabah om rayat dau mositi’ papatantu’ ‘ekstremisme’ ugama’ tinaru amu’ kagamut id pogun diti,” ka disio ontok pinopoimagon Karnival Krismas Inanam id Kakadayan Inanam, do hiti di konihab.
nokotindapou nogi’ i Ponorikohon Kounsol Gereja-Gereja Inanam, Pastor Bios Solingkin nogi’ tongo’ lansanon mantad mogisusuai denominasi Kristian.
Ka di Joniston, kopogisusuaian tinaru om ugama’ id Sabah do solinaid diti nosili intodonon ginaras, miampai mogigiyon dau noubas poimpasi, kumaraja’ om mamaramai kararamaian oinsanan sundung sopisuai nantadon.
Sumuku’ di uhu karnival, ‘Saved by Grace’, ka disio, pason dilo’ kopokito gatang pointongkop miagal do kolisihan om kosonongon i pogiilangan padarapas kotumbayaan om koubasanan.
“Id Sabah, pogititimbangan nopo nga’ somboogian mantad koposion tadau-adau om okito iti maya’ karalano’ mogigiyon mogiroromut nogi’ mamaramai kararamaian sompipi’ tiso’ om tiso’.
“Piuludan sosial diti nokoowit kumaa kaadangon om koyuon otoronong id pogun diti, i potilombus sabaagi wookon tataba’ bobos oponsol Sabah,” ka disio.
Joniston minoboros, piuludan dilo’, piniamung di kopogisusuaian koubasanan Sabah, nokoponginggirot nogi do timbayat ponombuluyan pogun diti tu’ tutumombului okon nopo ko’ oimbayat di kinolumison sandad posorili’, nga nogi’ mogigiyon dau di ongosuau.
Pinaanjur miampai Dewan Badaraya Kota Kinabalu (DBKK) om Kounsol Gereja-Gereja Inanam, Karnival Krismas Inanam nopo nga’ somboogian mantad kinoubasanan i nakapanau pointonod 2015.
Karamaian duo tadau dilo’ nopupusan di tadau baino’.
