Hajiji Hj. Noor
KOTA KINABALU: Boyoon Montiri, Datuk Seri Haji Hajiji Haji Noor minoboros, koporintaan pogun tumilombus monokodung Ababayan Pongindopuan i kopiongoi di sondikoton ikonomi pogun, monginggirot kogompitan songkinoiyonon om pibabarasan kopoopuan.
“Gunoon dahai poinsonong kosiwatan diti montok popoinggayo piuhupan padarapas piwolitan om popiromut kogorison songkinoiyonon miampai piromutan global. Kopiongoi di kosimbanon pongiikiraan global, sondikoton Sabah kakal atalang om pointingkanan.
“Tumilombus yahai popsoindak piawaian nogi’ mongulud piilangan miampai manahak koposuulan kumaa kopoindalanan om kapatahakan,” ka disio id boboroson ontok Forum Acara Perniagaan Antarabangsa ko-3 (BE id Sabah) 2026 doid Longkod Konvensyen Sompomogunan Sabah (SICC) do hiti di tadau baino’. Teks boboroson disio binasa’ di Monguhup Montiri kumaa Boyoon Montiri, Datuk Joniston Bangkuai.
Joniston ruminamit kad kopomosian mantad songinan robot montok popoimpuun BE id Sabah 2026 doid SICC di tadau baino’.
Boyoon Montiri minoboros, koporintaan pogun popoimagon Ababayan Pongindopuan sabaagi posiau oponsol kaparagatan ikonomi om koburuon Sabah, kitonggungan sabaagi koiyonon haro tingkananon i mongunsub kosunion pomorunan, papasanang karalnao’ pibarasan kopoopuan nogi’ mongunsub kotonudan nokoiyonon, kosuul no pongindopuan okoro’ om gonsuhatan, tinimungab abaal om bakat omulok.
“Kikohoroon asil miagal diti oponsol kopio mamaso tokou momogusa’ kosunion di poinpuli, aadang, ‘realistik’ om ogirot,” ka disio i minongoput do karalano’ koburuon Sabah mimpau kogiroton, kopoindalanan osonong om koponsupuan gatang timpu anaru.
“Karati tokou do kotumbayaan mangangapu’ om kotumbayaan sompomogunan okon i ko’ mantad no do kapahabaran, nga’ maya’ katatapan di ogirot, sondikoton di atalang om kopoindalanan i aanu ponungkayanan. Id haal diti, Ababayan Pongindopuan kosili sabaagi sunsuyon kosudong id pialatan katatapan om kopoindalanan, kabaalon global om kogorison nokoiyonon nogi’ kapatahakan,” ka disio.
Kohondot dilo’, minoboros isio, impohon miagal do BE id Sabah koposodia’ kosiwatan oponsol montok kogompitan do mitilombus miampai momumuruan pomorunan sompomogunan, suai ko’ mongingkawas kogorison om kinoinwoguon eskosistem nokoiyonon pogun.
Hajiji minoboros, Sabah id nindikohon di kohunung id ASEAN Kosilahon, songinan sub-rantau i tinandaan do koponsolon ikonomi oinsanan, ginaras sopigonop-gonop om kosiwatan piuhupan di agayo.
“Tumopot tokou di kogompitan oulud id landskap songkinoiyonon diti, monginggirot kopogiromuton, posuni piilangan nogi’ monokodung nimpohon kiwaya’ i kopomiuwa’ asil praktikal,” ka disio.
Minoboros isio, kopongonjuran ababayan diti id SICC, songinan kogogonopan i winonsoi pinotomod om kiginoris manganjur pitimungan kitukuran agayo nogi’ kompleks, kopokito tonggungan pogun montok mongingkawas kososodia’on surupukaraja’, monginsonong koponguludan kotinanan om monginggirot ginoris pomogunan montok papatantu’ tikid ababayan kopokito kalantaion om kabaalon.
Biro Konvensyen Sabah (SCB), i pointorina’ id siriba’ Komontirian Ponombuluyan, Koubasanan om Sandad Posorili’, nga’ monginggirot koyuyuon pasanang karalano’ diti miampai miuhup oronit di pomorunan monotk mongimbulai kokitonan i aanu ponungkayanon montok ababayan sompomogunan,” ka disio.
“Kumaa tinonudan sompomogunan, Sabah poinsodia’, noulud om nokososodia’ montok kogompitan. Kumaa tambalut nokoiyonon om songkinoiyonon, forum diti kopokito ponginsomokan koporintaan pogun i mimpau piawaian nogi’ tonggungan dahai di ouli’ kumaa kapatahakan,” ka disio.
