Dr. Joachim (kosiam, wanan) guminambar pongingitanan miampai mamaramit toluod.
KOTA KINABALU: Kiginumu’ 15,000 tulun orukut tinaru nokotindapou minamaramai Ramai Pomupusan Pamaramaian Karamaian Krismas Nayatan Pogun Sabah 2025 i nakapanau doid Padang Merdeka, do hiti.
Boyoon Montiri, Datuk Seri Haji Hajiji Haji Noor minoboros, pinamaramaian dilo i noondo diti nokosuang no toun ko-20 nokoburu’ nosili kotinanan pisompuruan, sunsuyon piobpinoian om kopokitanan piuludan rayat Sabah.
“Sabah Chrismas Celebration 2025 ponokotanda’ kinoukabon sunduan poinpuli om kogompitan oinsanan nayatan mogigiyon kopiongoi di angkab koporintaan pogun Sabah Maju Jaya (SMJ) i poposotol koburuon miadas kasasanangan sosial, pisompuruan rayat om kogiroton sandad pososorili’.
“Koporintaan pogun tumilombus papatantu’ pisompuruan rayat kakal ogirot montok mogowit lobi kogumu’ koburuon,” ka disio ontok ramai pinomupusan pamaramaian dilo’ id Padang Merdeka, do hiti di tadau Kolimo. Teks boboroson disio binasa’ di Kumoduo Boyoon Montiri I, Datuk Seri Dr. Joachim Gunsalam.
suai dilo’, minonuhu’ isio oinsanan rayat Sabah do tumilombus monginggirot sunduan pisompuruan, piuludan om kasasanangan pogialatan tinaru montok no do papalantoi ‘visi’ om ‘misi’ koburuon di pinalan koporintaan pogun.
“Sabah pasanganu rayat mantad mogisusuai tinaru, boros om kotumbayaan ugama i poinpasi oinsanan miampai oulud. Ilo’ kopokito pisompuruan otitimung i poposotol piuudan, pogitimbangan om pogihunungan pogialatan tinaru.
“Koporintaan pogun tumilombus papatantu’ koinsanai koubasanan om kararamaian tinaru nogi’ ugama pantangon kopiongoi di sunduan piuludan om kopogisusuaian id Sabah, kaampai no poposodia’ kooobian kousinan montok mamaramai kopogisusuaian dilo’,” ka disio.
Minoboros nogi’ i Hajiji do koporintaan pogun minamalan om pinopoindalan mogisusuai ababayan montok mongingkawas ikonomi rayat om pogun kaampai moningkanan kumaa balajaran om koburuon ‘modal insan’.
