Hajiji (tanga’) miampai Ponorikohon LPPB, Datuk Awang Ahmad Sah Awang Sahari (kaapat, gibang) om naalap suai minomutul kek kinouliton toun id Ramai Makan Otuong Kinouliton Toun Ko-59 LPPB.
KOTA KINABALU: Kotinanan Koburuon Pomuwalaian om Kakadayan (LPPB) nakalantoi minamawaal 29,443 unit Pomuwalaian Awam Kos Osiriba’ (PAKR) id pototongkop Sabah po’ompus onom nohopod toun pinonuridongan dilo’, potilombus dino nokopokito tonggungan osonong kotinanan dilo’ id koponumboyo’an ababayan pomuwalaian rayat pogun diti.
Boyoon Motiri, Datuk Seri Haji Hajiji Haji Noor minoboros, suai ko’ ponuridongan pomuwalaian ginumuan kos osiriba’, LPPB nga’ pinapapanau tonggungan tonggungan oponsol id koburuon Walai Aanu Sumanganu (Rumah Mampu Milik – RMM) nogi’ tongo’ projik komosil i kouhup koporintaan pogun popironit pisuyans sosio-ikonomi id pialatan mogigiyon kakadayan om labus kakadyaan miampai lobi koulud om poinpuli.
Minamarayou isio inggisaman po’ompus LPPB i atatap pinopoindalan projik pomuwalaian id poliliput Sabah, kopiongoi di ‘visi’ koporintaan pogun montok papatantu’ koburuon di kopotonggoi ngaawi, aadang om kiwaya’ akawas kumaa rayat.
“Koporintaan pogun mongunsikou kopio tonggungan om kinouhupan agayo LPPB sabaagi songinan kotinanan agayo koporintaan id siktor koburuon pomuwalaian om kakadayan,” ka disio onotk minoboros id Ramia Makan Totuong Kinouliton Toun ko-59 LPPB id The Magellan Sutera Resort, do hiti di songkosodop.
Minoboros isio, naangayan dilo’ kopokito kinosukodon LPPB i noondo diti luminaang id umur 59 toun, suai ko’ kinogorison dilo’ do tumilombus kakal kosudong, kiginoris tumopong om kiwaya’ id koponoguangan kaantaban koburuon pomuwalaian maso-maso.
“I oponsol kopio, nuru’ tokou papatantu’ LPPB okon nopo ko’ koinggirot, nga’ kotilombus koinggayo om koponguhup miampai kiwaya’ kumaa kasasanangan rayat Sabah,” ka disio.
Minoboros isio, kopiongoi di sondikoton Bajet Pogun Sabah 2026 i moningkanan kumaa koposiahan koburuon montok kasasanangan rayat, koporintaan pogun maya’ Komontirian Koporintaan Koiyonon om Pomuwalaian Sabah tumilombus manhaak kopomodulianan pointotopot di koposodiaan pomuwalaian ginumuan, kaampai pomuwalaian kos osiriba’ om walai ogoosan sumanganu id pototongkop pogun.
Hajiji minoboros, montok tuduan dilo’, koporintaan pogun maya’ LPPB monilombus kopoindalanan pipiro inggisaman agayo, wookon dilo’ koburuon Pomuwalaian Ginumuan Kos Osiriba’ id Sukau, Melalap, Beluran om Pitas.
Suai dilo’, ka disio, kopoindalanan RMM i masaan om maan turidongo’ kopohompit 2,358 unit id kinoiyonon kosudong miagal Sandakan, Papar om Kota Kinabalu nga’ nosili nogi’ do tingkananon kopio.
Suai ko’ siktor pomuwalaian, ka di Hajiji, iso’ mandat oponsol LPPB nopo nga’ mamalan om popoburu’ tongo’ kakadayan wagu montok mongunsub kosunion ikonomi nokoiyonon om monginggirot koburuon labus kakadayan.
Ka disio id timpu diti, LPPB pinopoobi’ montok koburuon siam kakadayan wagu i nointutunan, ilo’ nopo nga’ id Tongod, Paginatan, Merotai, Sungai Melayu Sebatik, Sukau, Melalap, Ulu Dusun, Beluran om Penangah.
“Kalansanan ku ponuridongan tongo’ kakadayan wagu diti aanu popoindalan miampai napalan, poinsonong om kopohompit ngaawi, kopiongoi di kogunoon rayat nogi’ kosiwatan ikonomi songkoiyonon,” ka disio.
Hajiji nga’ pinopoilo nogi’ do LPPB noondo masaan popoindalan iso projik piuhupan miampai songinan komponi swasta i kopohompit kopoundolihan kopoiyanan setinggan kumaa koiyonon pongingiyonon kawagu lobi poingulud.
Otumbayaan isio do inggisaman dilo’ kouhup kopoirntaan pogun monoibau pongingiyonon setinggan do lobi kiwaya’, potilombus dino kopongingkawas koyuon koposion rayat di poinhompit.
Id haal poinggompit, Boyoon Montiri pinoposotol tonggungan koporintaan pogun montok monuridong lobi kogumu’ walai aanu sumanganu, kaampai maya’ mogisusuai kaparagatan miagal Rumah Mesra Sabah Maju Jaya (SMJ) nogi’ ponuridongan pomuwalaian kos osiriba’ do LPPB.
Ka disio, montok toun diti, koporintaan pogun momoruhang ginumu’ kuota Rumah Mesra SMJ mantad 40 unit kumaa 50 unit montok tikid Lintuhun Undangan Pogun (DUN).
Ka disio, pomoruhangan 10 unit Rumah Mesra SMJ dilo’ pinotomod kumaa tinimungan kiumur 40 toun om id siriba’, i nokoponuridong kolominan om aiso’ walai, sabaagi inggisaman monguhup sukod wagu sumanganu iyonon sondiri.
“Inggisaman diti oponsol montok monumboyo’ kogugunoon rayat kaampai id koiyonon labus kakadayan nogi’ mongingkawas rontob koposion mogigiyon Sabah.
“Tikid projik di turidongon do LPPB okon nopo ko’ id struktur fizikal, nga mogowit angkab, timpu dumontol om kasasangan rayat. Hilo’ no o gatang kopio tonggungan LPPB, okon ko’ monuridong nopo linimput, nga’ monuridong koposion om mogigiyon,” ka disio.
