Herbert (kotolu, gibang) pinapatahak ponguhupan kumaa songulun mogigiyon kampung.
TENOM: Pipiro kampung id watas Lintuhun Undangan Pogun (DUN) Melalap noliudan nosusuhut rasam po’ompus id sarayo Baang Padas.
Montiri Pomutanaman, Ponginsadaan om Pomorunan Akanon (MAFFI) po nogi’ ADUN Melalap, Datuk Jamawi Jaafar minoboros, koyuon liyud dilo’ nakadala’ di konihab om minamason isio mogigiyon di nohompitan do toririmo monidsorou om mananud ponuhuan bohogian kikuasa’ maya’ Puruankuasa Kadaaton Sandad Watas Tenom.
“Mogigiyon i poingiyon id koiyonon di naantakan pokionuon toririmo miontong rontob waig om tumanud di ponuhuan bohogian kikuasa montok papatantu’ koumoligan tinan om paganakan. Koumoligan mogigiyon nopo nga’ i posuulon dahai,” ka disio id kointalangan di tadau baino’.
Tongo’ kukumaraja om oinsanan i poinhompit poingunda’ popoikid ponguhupan kumaa paganakan i noumpadanan gama-gama’ liyud.
Di ko 4tw Koiso’ 2026, pipiro kampung di nohompitan nakaramit ponguhupan liyud montok papagaan okuuri’ pitorinaan sangangadau mogigiyon. Tinonudan ponguhupan binuruan di Monunurat Pulitik di Jamawi, Herbert Roger London.
Wookon kampung di nohompitan do liyud nopo nga’ Kampung Tumantalik, Kampung Pontomon, Kampung Pantogon Saga, Kampung Bulun, Kampung Binaie, Kampung Saga, Kampung Batu- Batu, Kampung Mandalom Lama om Kampung Sri Menanti.
Ka di Jamawi, ponguhupan dilo’ potilombuson kumaa oinsanan mogigiyon i noumpadanan doid DUN Melalap i kakal po do amu’ nakaramit ponguhupan.
“Tumopot yahai papatantu’ oinsanan nohompitan liyud kaanu ponguhupan di korungod om koponilombus koposion miampai oumolig,” ka disio.
Pinopsorou nogi’ isio do pogintangan po’ompus nuru’ powonsoiyon tu’ rasam di po’ompus kikosiwatan papagayo waig baang, potilombus dino koponubuanan liyud id koiyonon di osiriba’.
