Jamawi ruminuba’ oinsanan Luguan Markas Pomilian Agayo DUN Melalap id Kinapamaramaian Krismas di tadau baino’.
TENOM: Koporintaan pogun id siriba’ kopomuruanan di Boyoon Montiri, Datuk Seri Haji Hajiji Haji Noor tumilombus pinopokito kopusohon om tonggungan kumaa koinsanai gereja di siriba’ Kounsol Gereja Sabah (MGS) miampai pinopoobi’ songintob kousinan kumaa tongo’ tinan kougamaan okon Islam.
Montiri Pomutanaman, Ponginsadaan om Pomorunan Akanon po nogi’ Puru Lintuhun Undangan Pogun (ADUN) Melalap, Datuk Jamawi Jaafar minoboros, pamaramaian Krismas i pohoroon tikid toun okon ko’ kararamaian kougamaan tomod, nga nosili tanda pisompuruan, piuludan om sunduan kopogiisaan rayat mogisuai tinaru nogi’ ugama id pogun diti.
Minoboros isio dilo’ id Ramai Kinapatahakan Toluod Ikhlas kuminaa 61 gereja id DUN Melalap, doid Lintuhun MRSG. Wancher St. Anthony Tenom, di tadau baino’.
Minamason nogi’ isio tulun ginumuan i mooi kakap paganakan id labus kinoiyonon do toririmo monidsorou ontok papamanau padsakaian om papatantu’ koumoligan po’ompus tindalanon.
Jamawi tuminabi’ dilo’ Puru Kounsol Gereja Tenom.
Jamawi om sawo, Datin Zainatunnisa Ibrahim minagalap tulun ginumuan om nogi’ oinsanan puru gereja do tumindapou doid Ramai Walai Poingukab Krismas DUN Melalap 2025 i pohoroon id Lintuhun Poingukab OKK Datuk Sanggau do ko’ 28tw Kohopod om Duo diti mimpuun jaam ko’ 11.30 kosuabon i ponorikohon di Alfhonso Fiel.
Naamot dilo’, Ponorikohon Kounsol Gereja Tenom, Aidah John lumansan do kaanu mamaramai Krismas di lobi karamai miampai di Jamawi do toun tiso’ om monongkounsikou do toluod kumaa oinsanan gereja nogi’ lumansan di kotilombus i Jamawi popoburu’ gereja nakalaid id DUN Melalap.
Nokotindapou nogi’ i Luguan Wats, Tusib Tulas om kopomuruanan gereja di suai.
Talib dilo’, i Jamawi minooi ruba’ di 147 Luguan Markas Pomilian Agayo DUN Melalap doid Longkod Surupukaraja’ Mobi’ Rayat N.42 Melalap montok kinapamaramaian Krismas.
