Hajiji ruminamit gambar dau sondiri’ i kapaampai mantad kolaj lobi 400 gambar ababayan susumikul TAR UMT mantad mongongobi’ susumikul.
KOTA KINABALU: Kopongukaban Univositi Ponguludan om Tiknologi Tunku Abdul Rahman (TAR UMT) Raan Sabah kopiongoi di angkab Koporintaan Pogun montok popoburu’ modal insan i abaal id Sabah.
Boyoon Montiri, Datuk Seri Haji Hajiji Haji Noor minoboros, isio mamaramit osonong inggisaman boogian ponguludan akawas TAR UMT mantad ninggisaman diolo’ ruminalad doid Sabah, potilombus dino misokodung miampai koporintaan pogun id laang monguhup do kopoburuan balajaran id pogun diti.
“Otopot nopo kinoimbulayon TAR UMT Raan Sabah diti kapanahak ogumu’ kosiwatan om sumpili’ kumaa tangaanak Sabah do mongoput balajaran diolo’ kumaa univositi amu’ nuru’ monongkiad pogun diti,” ka disio onotk minoboros pinopoimagon TAR UMT Raan Sabah id Alamesra, do hiti, di tadau baino’.
“Romiton ku falsafah TAR UMT ‘Beyond Education’ i okon nopo ko’ poposotol kalantaion akademik nga nogi’ posuni ginoris oponsol om popoburu’ do koyuon sivik id tinan susumikul dau. Iti nopo nga’ kinoburuon osonong i kapagaras susumikul kosuul no sukod wagu id Sabah okon nopo ko’ mamagampot iman-imanon diolo’ nga’ kouhup nogi’ kumaa koburuon pogun,” ka disio.
Hajiji suminain plak kopihondot kinopoimaganan TAR UMT Raan Sabah om poingintong i Ponorikohon Kotinanan Potunud Yayasan Balajaran TAR, Datuk Seri Wee Ka Siong (koduo, wanan).
Hajiji minoboros, balajaran nopo nga’ posunduran komogoton om koburuon om nosili tonggungan toinsanan montok papatantu’ tangaanak id Sabah kaanu balajaran bobos osonong.
“Ilo’ no pogi’ do modal insan nopo nga’ iso’ mantad tolu tingkananon palan koburuon tokou ilo’ nopo, Hontolon Sabah Maju Jaya (SMJ). Modal insan nopo nga’ tataba’ tokou di bobos agayo. Miampai mangapu’ id balajaran, pingludaan om koburuon komilaan, momorikot tokou montok poposodia’ mogigiyon dati’ do monoguang kaantaban om kosiwatan timpu dumontol,” ka disio.
Tumanud disio, Koporintaan Pogun pinopoobi’ RM475 riong montok monginggirot kopoburuan modal insan do toun diti, om minoboros komulakan nopo nga’ kogumuan mogigiyon Sabah om Koporintaan Pogun potitilombus moningkanan doid kapagarasan komulakan mooi do koponigampot kosiwatan poinponu’ montok papapanau koburuon timpu dumontol Sabah.
Minoboros isio, kopiongoi di ‘Dasar Belia Sabah’, Koporintaan Pogun pinopoobi’ RM16.9 riong montok popoindalan Ababayan Kopoburuan Kopomuruanan Komulakan Sabah i kopuli do kaparagatan sukarelawan om pisompuruan sosial.
“Om nogi’, tumilombus tokou manahak intodonon ngaawi’ di gunoon montok popoindalan mogisusuai ababayan montok komulakan tokou, kaampai no kaparagatan kopomuruanan, komilaan om kopongindopuan.
“Skim koburuon komulakan miagal Skim Kejayaan Usahawan Belia Sabah (SYABAS) maan tilombuso’ montok monokodung mongingindapu’ omulok id koponimpuunan om monginggirot inggisaman kopongindopuan diolo’,” ka disio.
Hajiji minumbal seni kaligrafi Sina’ om poingintong i om poingintong i Ponorikohon Kotinanan Potunud Yayasan Balajaran TAR, Datuk Seri Wee Ka Siong (koduo, wanan).
Hajiji minoboros, Koporintaan Pogun pinopointutun mogisusuai ababayan om inggisaman montok monokodung om monginggonop komulakan wookon nopo Kounsol Pirundingan Susumikul (MPPS) i nosompuru di lalansanon susumikul kotinanan pinssingilaan akawas koporintaan om swasta mantad poliliput pomogunon kaampai univositi, politeknik, tinimungan om kotinanan komilaan nogi’ sikul mananga’.
“Iti nopo impohon oponsol montok sukod wagu Sabah miilang pomusarahan om angkab diolo’ miampai dati’ montok papatantu’ kalantaion Palan Koburuon Hontolon SMJ.
“Ilo’ nopo nga’ impohon kosudong montok komulakan id Sabah gumompit id koburuon pogun mitonggoi minsingilo om mantad dilo’, tumilombus tokou monginggirot inggisaman diti do posuni kalantaion kopomuruanan timpu dumontol dati’,” ka disio.
Boyoon Montiri minoboros, koposodiaan balajaran akawas di osonong nga’ oponsol nogi’.
“Oponsol do kogumuan susumikul id Sabah umampai doid balajaran STEM (Sains, Tiknologi, Kejuruteraan om Matematik).
“Komontirian Sains, Tiknologi om Inovasi Sabah nakapamalan Palan Strategik 2022-2025 sabaagi puralan montok kopoindalanan mogisusuai ababayan om inggisaman do papagaras ekosistem sains, tiknologi, inovasit om ikonomi (STIE) id Sabah.
“Palan diti momorikot sokukuri’ 40 pihatus susumikul sikul id haro id aliran sains dumontol 2025. Miampai rikoton diti, nosili lobi koponsol montok Sabah do kiharo kotinanan pinsingilaan akawas di osonong montok poposodia’ kosudongan pinsingilaan akawas kapaampai STEM di osonong montok susumikul id Sabah,” ka disio.
Hajijij minoboros, mogisusuai inggisaman tinuridong montok monguhup tonggungan kousinan susumikul Sabah miagal do Sikulasip Susumikul Cemerlang Sabah, Sikulasip Susumikul Labus Kakadayan Cemerlang, sikulasip kotinanan pinsingilaan akawas koporintaan om swasta, om dermasiswa maya’ Yayasan Sabah.
“Di 2022, Koporintaan Pogun nokopuhu RM55.7 riong montok monuridong Tabung Balajaran Pogun Sabah (TPNS) om gisom tulan Kohopod om Duo 2023, lobi 2,800 susumikul i tuminanud pinsingilaan akawas id Sabah, Sarawak, Semenanjung Malaysia om labus pogun nakaramit ponguhupan kousinan mantad TPNS.
“Suai dilo’, ounsikou oku noilo do id tinimungan mamaramit diti, 12 mantad diolo’ nopo nga’ susumikul TAR UMT.
“Id kalaangan kumaa toguang, kanou tokou no toinsanan papatantu’ komulakan tokou kotilombus kiginoris monokitopong om kaanu monguhup kumaa kalantaion angkab Sabah Maju Jaya om pomogunon do poinpuli,” ka disio.
