Jamawi minintong durian i tinanom do hilo’.
PENAMPANG: Montiri Pomutanaman, Ponginsadaan om Pomorunan Akanon, Datuk Jamawi Jaafar minongunsub rayat pogun diti do momoruhang kapananaman ‘durian premium miagal do Musang King, Duri Hitam, IOI nogi’ point nokoiyonon di osonong montok monumboyo’ kosiwatan pidagangan poudaron, kosuul no kumaa China id timpu limo toun obontol.
Minoboros isio, noondo diti Sabah kakal okurian tanom durian premium soira’ ginumu’ dilo’ kopokito ginayo 5,000 ekar om 800 ekar guas di nosukod om kapalabus asil.
“Iti kopokito do kakal tokou osodu’ noiduanan naamot kopokionuan, lolobi no mantad China om Korea, akawas kopio kumaa durian premium kaampai no ponit nokoiyonon Sabah,” ka disio ontok kinotombuluyan miampai media doid kabun durian Kampung Timpangoh Laut, Sugud, do hiti di songkonihab.
Jamawi minanahak kopointalangan potilombus karait durian i tinanom id kabun dilo’.
ka di Jamawi, wookon ponit nokoiyonon i kiharo kosiwatan agayo nopo nga’ Kinabalu King, Durian Dalit om Durian Tenom Beauty i nakaramit no do kororohian tutumombului sompogunan.
Ka disio, Kinabalu King pinungaranan do Koisaan Manananom Durian om Tuwauwa’ Tropika Sabah pointonod tolu toun nakatalib montok manamong sinonong om nogi’ pungaran id pidagangan.
Kohondot dilo’, minokianu isio ponguhupan boogian media montok papahabar kumaa mogigiyon do durian nopo nga’ tanom di kikosiwatan akawas i kouhup rayat lumabus mantad buris komosikinan.
ka disio, mimpuun toun tiso’, Komontirian disio popogoris Ababayan Kebun Dapur miampai mongunsub mogigiyon labus kakadayan mananom sokukuri’ apat gisom limo guas durian premium id pososorili’ walai diolo’.
“Asil dilo’ timungon tokou id longkod ponimungan i noturidong miampai Koperasi Koburuon Desa (KPD) soginumu 10 longkod om onom po do Koupisan Pomutanaman,” ka disio pinopointalang.
Ka di Jamawi, komontirian popoindalan nogi’ kapapanahan mogiuhup kopohompit koinsanai kotinanan id siriba’ MAFFI kaampai siktor ponginsadaan, veterinary om Pomorunan montok monguhup rayat naamot mindad osukod durian id timpu limo gisom onom toun.
“Maan do poiradan, kaanu yolo’ momogompi’ sada’ tilapia toi manuk toonsion om manuk pogontolu id tohuri Walai montok koonuan nindopuan naamot mindad asil durian,” ka disio.
Jamawi (kolimo, wanan) miampai tinonudan guminambar pongingitanan katalib pinapaharo kinotombuluian id kabun durian dilo’.
Minoboros isio, koiyonon dilo’ palanon do poburuon sabaagi ririkoton agroponnombuluyan montok Penampang om Kota Kinabalu id timpu iso’ gisom duo toun obontol tu’ mantad kinoiyonon dilo’ i kikiro do 45 minit no mantad kakadayan Agayo.
“Manu tokou do tutumombului mantad China om Korea rumikot mooi pangakan durian id kabun om mihohombo id koiyonon baang i ogumu sada’ pelian do hiti,” ka disio.
Jamawi nga pinopoilo nogi’ do koisaan manananom minongukab songinan kilang momurisis om papadagang durian id Keningau om inggisaman dilo’ poinggoyoon kumaa Tawau nogi’ Kota Kinabalu, kaampai koiyonon KKIP miampai sokodung FAMA.
“Moningkanan oku kumaa koburuon pomutanaman miampai poinpuli om papatantu’ rayat labus kakadayan karati do durian premium kikosiwatan Agayo monimban rontob koposion diolo’,” ka disio.
Ka disio kawagu, bohogian disio miuhup po nogi’ do Univositi Malaysia Sabah (UMS) om UiTM Sabah id ponudukan, ponorisidan nogi’ pomogunaan agronomi, kaampai pomogunaan bahan organic om pomutanaman ogirot montok manamong kogompion sandad posorili.
Nokotindapou nogi’ Monguhup Montiri I om II MAFFI (Komontirian Pomutanaman, Ponginsadaan om Pomorunan Akanon), Datuk Haji Ruslan Muharam om Datuk Hendrus Anding; Monunurat Pointatap Komontirian, Datuk Leonard Stephen Poyong miampai pipiro monitor agayo kotinanan komontirian dlo’.
