Julita Mojungki
KOTA KINABALU: Montiri Koonduan, Kolidasan om Kasasanangan Mogigiyon, Datuk Julita Mojungki pinoposotol tonggungan komontirian dau do tumilombus papagaras koonduan, mongingakawas surupukaraja’ kolidasan om popoinggayo ababayan kasasanangan mogigiyon miampai poinpuli id Sabah do toun 2026.
Id boboroson pinopolopian dau id pitimungan Lintuhun Undangan Pogun (DUN) Sabah di tadau baino’, pinolombus disio pongunsikohan kumaa Kumoduo Boyoon Montiri II po nogi’ Montiri Kousinan Sabah, Datuk Seri Masidi Manjun mantad Bajet 2025 i ki’uhu “Memacu Pembangunan, Kesejahteraan Rakyat Diutamakan” (Posiau Koburuon, Kasasanangan Rayat Posuulon).
Julita pinoposotol do bajet dilo’ kopokito tonggungan koporintaan pogun id koposindakan kasasanangan oinsanan nayatan mogigiyon, lolobi no tinimungan di obinhompitan (rentan), miampai poinpuli (inklusif) om pointonggoi ngaawi’ (holistik).
Montok ababayan koburuon koonduan, ka disio, komontirian dau popoinparagat kaparagatan poinharo mantad om popointutun inggisaman wagu kaampai: Ababayan JHEWA BizBloom montok pintoriningan pongindopuan om pangahakan mentor montok ‘ibu tunggal’ om koonduan B40; Ababayan ‘Keluarga Sejahtera Wanita Unggul’ montok mongingkawas komilaan ponguludan paganakan; nogi’ kopoinggayaan Ababayan ‘GENDERasi Harmoni’ kumaa 10 watas montok mongingkawas kopurimanan kokomoi kaadason gender om koburuon mimpau pogintongan (lensa) gender id mogigiyon labus kakadayan.
Id siktor kolidasan, komontirian mongoput Ponguhupan Caj Pongusapan Hemodialisis id pototongkop kogogonopan kolidasan koporintaan do 2026, i pikikiro kapanahak koundaran kumaa 2,219 susumakit luluso. Inggisaman diti nopo nga’ fasa kumoduo Skim Ponguhupan Kolidasan SMJ “Sabah Sejahtera” katalib kinopoikidan 100 misin hemodialisis diti 2025.
Montok kasasananga rayat, Ababayan Ponguhupan Sosial Sikul maan tilombuso’ id 1,074 sikul osiriba’ pototongkop Sabah montok monginggaan tonggungan kousinan molohing. Ponguhupan suai kumaa tulun nolohing, OKU, tanak-anak, ibu tunggal, nogi’ nogompitan kadaat nga’ maan tilombuso’, kaampai kopoinggayaan Longkod Autisme Sabah id Sandakan, Tawau om Beaufort, miampai Longkod Autisme Tawau pikikiro ukaban pintangaan wulan Koiso’ 2026.
“Komontirian nga’ mamalan nogi’ popoinggayo surupukaraja’ panamangan tulun nolohingon maya’ Kompleks Warga Emas om OKU Inanam i pikikiro opongo wulan Kowalu’ 2026, om Walai Warga Tua Kendiri Telupid i moningkanan tulun nolohing olidas om mimpoopori, pikikiro opongo tulan Kotolu 2026. Pomoruhang nopo, Longkod Panamangan Tadau-adau (MERPATI) pointutunan id pipiro koiyonon kaampai Walai Tulun Nolohing Sri Pritchard, Kota Kinabalu, Sandakan om Tawau,” ka disio.
Julita pinoposotol nogi’ tongo’ ababayan kopohompit pogun ‘bebas dadah’, maya’ ponorisidan waya’ Ababayan PEMADAM 2025 i nosili puralan koposodiaan inggisaman wagu, nogi’ ababayan kokomoi pisompuruan, institusi doun paganakan om koponggunaan do 2026.
Minonimbar nogi’ isio pipiro ponguhotan ADUN, kaampai koburuon Kolinik Kolidasan Ponit 2 Taman Sejati montok monowoli kogogonopan poinharo mantad i kaanu manampung 800 susumakit sangadau, nogi’ papatantu’ kowowonsoiyo’ kotinanan tulun nolohing mananud katatapan koumoligan om sitandod kolidasan.
Id sisimbar kumaa di ADUN N.67 Balung, pinopoilo isio Longkod Autisme Sabah (PAUS) Kota Kinabalu noukaban pointonod ko 14tw Kowalu’ 2025 montok tangaanak kiumur tolu gisom turu’ toun, om poinggoyoon kumaa Tawau, Sandakan om Beaufort montok monguhup monginggaan koinggoritan molohing id sunduk kousinan om karaja’ sangangadau.
Julita pinoposotol, komontirian disio tumilombus monimporon ponginsomokan poinpuli, kosudong om ogoris id kapagarasan koonduan, kolidasan om kasasanangan rayat, kopiongoi di sondikoton koburuon pogun Sabah do 2026.
