Syahlan (gibang) tinanud di Andi (wanan) soira’ rinubaan media.
KOTA KINABALU: Pipiro wawaya’an agayo id pososorili kakadayan agayo maan sompono’ montok manahak koiwatan kumaa pongonjuran Kapamaramaian Krismas Nayatan Pogun Sabah Ko-20 Toun 2025.
Kumoduo Luguan Koupisan Ponoriukan om Pogirotkuasa’an Trafik (JSPT) IPD Sabah, DSP Syahlan Sukimin minoboros ponomponan ralan dilo’ kopohompit sesi rampai kumoiso’, raptai koduo om nogi’ ababayan limunduk kapamaramaian i pinoulud kapanau do ko 16 om 19tw Kohopod om Duo diti.
“Kiginumu’ limo ralan agayo id dodoros kinoiyonon pamaramaian maan sompono’ do montoroiso’ ontok tadau dilo’, tumanud di koyuon trafik maso-maso.
“Raptai kumoiso’ pohoroon do ko 14tw Kohopod om Duo susuhotonon rapai kumoduo do ko 15tw Kohopod om Duo.
“Naamot Ramai Kopoimaganan Kapamaramaian Krismas kapanau do ko 16tw Kohopod om Duo,” ka disio soira’ rinubaan media katalib pinibabarasan id konti Sabah FM, di tadau Koiso’.
Ramai Kopoimaganan Pamaramaian Tadau Krismas dilo poindalanon di Molohingon Agayo Pogun Sabah, Tun Musa Aman.
Kohondot dilo’, minamason isio moomoguno talun-alun do mamantang ponuhuan puru poingkaraja’, momoguno waya’an sumpili’ i pinaatag maya’ aplikasi miagal Google Maps, opusou om manahak ralan kumaa padsakaian aarau-arau miagal do ambulans.
Montok papatantu’ koturunduson trafik, JSPT Sabah pinoposodia’ palan ponguludan trafik kaampai palan kopoundolihan waya’an om mongilo ralan di sinopon, nukaban om pinolisang.
