Hajiji guminambar miampai Montiri MIDE, Datuk Phoong Jin Zhe om puru Kabinet Pogun suai pogulu nokotimpuun kopointalangan.
KOTA KINABALU: Ginumu’ koinsanai kopoopuan labus om suang pogun i pinolulus id siktor kapamansaian doid Sabah pointonod wulan Kosiam 2020 pikiikiro soginumu’ RM17.41 bilion mantad 73 komponi.
Monunurat Pointatap Komontirian Koburuon Pomorunan om Mongindapu’ (MIDE), Datuk Thomas Logijin minoboros, mantad di 73 komponi dilo’, 52 nokoponimpuun no do karaja’ id pogun diti miampai ginumu’ kopoopuan RM7.8 bilon, potilombus dino nokopongimbulai 3,636 kosiwatan pakarajaan.
Minoboros isio dilo’ ontok kotombuluyan karaja’ Boyoon Montiri Datuk Seri Haji Hajiji Haji Noor kuminaa komontirian dilo’ di tadau baino’.
Kinotombuluyan kuminaa MIDE dilo’ kopokiro kinoompokon kinotombuluyan di Boyoon Montiri kuminaa koinsanai komontirian pogun pointonod toun nakatalib do mokinongou kinoburuon om nogi’ kinopoindalanan ababayan i masaan poindalan om palan wagu do obontol.
Ka di Thomas, mintonod toun 2022 gisom 2024, Sabah nga’ nakaramit nogi’ atag kopoopuan wagu kigatang pomoruhang RM42.3 bilion i kopouyu 32,996 kosiwatan pakarajaan. Iti kaampai kopoopuan mantad Esteel Enterprise Sabah Sdn. Bhd. (RM19.6 bilion), i mamaso do id kopohimogonan.
Ka disio, Esteel nakaramit Lisin Kapamansaian Pisompuruan (FML) di ko 24tw Koiso’ toun diti montok projik Fasa Iso’ kigatang RM4.77 bilion id Sipitang Oil and Gas Park (SOGIP).
Minoboros isio, kopoopuan suai kaampai mantad Curix Sdn. Bhd. (KKIP), nuludan kopolobusan kotolu Kibing Group (KKIP), Tex Evolusi Waste Management Sdn. Bhd. (SOGIP) om E Concern (Borneo) Sdn. Bhd. (SOGIP).
Ka di Thomas, MIDE nga’ masaan nogi’ mongulud atag kopoopuan doun wagu mantad Kibing Group id Kimanis, TS Asia Green Infrastructure Sdn. Bhd. id POIC Lahad Datu, nogi’ PMB Tecnhnogoly/Press Metal id Sipitang.
Miampai oinsanan, Sabah kaanu kopoopuan kigatang RM58.319 bilion,” ka disio.
