Hajiji minintong asil pinalabus PKS Sabah miampai di Montiri Kousinan, Datuk Masidi Manjun om Montiri MIDE, Datuk Phoong Jin Zhe pogulu kinopointalangan.
KOTA KINABALU: Komontirian Koburuon Pomorunan om Mongindapu’ (MIDE) mimamalan montok papaharo apat Karnival Pongindopuan Mikro, Okoro’ om Gonsuhatan (PMKS) toun diti.
Monunurat Pointatap MIDE, Datuk Thomas Logijin minoboros, karnival dilo’ pohoroon id Tawau, Tuaran, Kudat om Keningau.
Id kopointalangan disio kopihondot kotombuluyan karaja’ Boyoon Montiri, Datuk Seri Haji Hajiji Haji Noor kuminaa MIDE di tadau baino’, ka di Logijin, haro 8.031 mongindapu’ PKS i poinrojistor miampai Koupisan Koburuon Pomorunan om Ponolidikan (DIDR) id siriba’ MIDE.
Minoboros isio, mogisusuai ababayan pinalan montok monguhup PKS id Sabah, wookon dilo’ ababayan SME-Up, kurusus koburuon mongindapu’, kimpin Momoli Produk Sabah, nogi’ kapadagangan om kopointutunan produk Sabah id pasar agayo nokoiyonon miagal Bataras, Kedai Mesra Petronas om Longkod Produk PKS.
Suai dio’, komontirian nokopongintutun 87 mongindapu’ montok tumanud mogisusuai pokikitanan pidagangan om ekspo pomogunan id labus pogun montok manahak kopoilaan kumaa asil wonsoi pinalabus diolo’ id pidagangan sompomogunan toun diti.
Minongolimpupus kotombuluyan karaja’ kumnaa oinsanan komontirian, Hajiji minamarayou inggisaman MIDE id kopongimbayatan kopoopuan labus om suang pogun kumaa Sabah nogi’ monguhup koonuan nindopuan montok pongindopuan okoro’ om gonsuatan (PKS).
“Komontirian diti oponsol kopio tu’ kouhup koonuan nindopuan montok pogun, om tumanud kopointalangan diti tadau baino’, okito do monotos yolo’ kumaraja’ kopiongoi di Sondikoton Sabah Maju Jaya (SMJ),” ka disio.
“I nopo oponsol nga’ oinsanan palan mositi’ powonsoiyon miampai oulud, om id timpu di miagal, okon nopo ilo’ ko’ kopountung komponi agayo nga nogi’ PKS,” ka disio kawagu.
Boyoon Montiri manu do MIDE tumilombus moningkanan kumaa koburuon PKS nokoiyonon om monguhup diolo’ maganu koilaan id nayatan sompomogunan.
Sinuhu’ nog’ disio komontirian do monilombus atag kopoburuan tolu taman pomorunan wagu id Kudat, Beaufort om Kota Belud.
“Sabah kaanu mongingkawas ningkakaton dau soira’ taman pomorunan wagu diti koindalan,” ka disio.
Boyoon Montiri nga’ nakaanu nogi’ kopointalangan mantad tongo’ momuruan kotinanan id siriba’ MIDE miagal do Kotinanan Koburuon Ikonomi Sabah (Sedco), KKIP Sdn. Bhd., Palm Oil Industrial Cluster (POIC) Lahad Datu, Sabah Oil and Gas Development Corporation (SOGDC), Invest Sabah Berhad om Sabah Trade and Tourism Office Singapore (STTOS).
Nokotindapou nogi’ Montiri Koburuon Pomorunan om Mongindapu’, Datuk Phoong Jin Zhe, Monitiri Kousinan, Datuk Seri Masidi Manjun, Montiri Koburuon Labus Kakadayan, Datuk Jahid Jahim, tongo’ monguhup montiri om momuruan ngaawi’ koupisan om kotinanan.
