Hajiji (oolikudan, tanga’) miampai Montiri Piromutan, Fahmi Fadzil (oolikudan, wanan) suminasi’ Ababayan Suminain Mamorandum Pihunungan pialatan DBKK om MCMC.
KOTA KINABALU: Piuhupan pialatan Dewan Bandaraya Kota Kinabalu (DBKK) om Suruhanjaya Piormutan om Multimedia Malaysia (MCMC) koposikap Kota Kinabalu kumaa sumili songinan kakadayan agayo ‘pintar’, poinggompi’ om koburu’ potilombus dino kaanu tumopong id nayatan pomogunan.
Boyoon Montiri, Datuk Seri Haji Hajiji Haji Noor minoboros, sabaagi longkod pogun Sabah, Kota Kinabalu okon ko’ longkod pomorintaan nopo nga’ nogi’ longkod ikonomi, ponombuluyan om ‘inovasi’ tiknologi i nosili koondosan koinsanai mogigiyon Sabah.
Minoboros isio, pisokodungan pialatan DBKK om MCMC maya’ Memorandum Pihunungan (MoU) i nopikogos di tadau baino’ nopo nga’ laang agayo kumaa koponigampotan ‘visi’ Sabah sabaagi pogun i koposiau koburuon ogirot maya’ ‘digitalisasi’.
“Kota Kinabalu kosili turianan kakadayan agayo pintar i popokito poingkuro tiknologi kaanu papagaras koposion mogigiyon om monokodung kosunion ikonomi pogun.
“Maya’ MoU diti, kopoindalanan pipiro projik kitukuran agayo maan powonsoiyon wookon dilo’ kopogiromutan digital di poinpuli, haal koumoligan ginumuan om kogogonopan pintar miagal kapadakatan kamera litar pointirung toi CCTV, digitalisasi kopoindalanan om surupukaraja’ montok poposili kopoindalanan lobi opulokis, mongingkuri’ ‘birokrasi’ nogi’ nubasanan digital om ikonomi aiso’ tunui (tunai),” ka disio.
Minoboros isio dilo’ kopihondot Ramai Suminain MoU id pialatan DBKK om MCMC id Longkod Konvensyen Sompomogunan Sabah (SICC) do hiti, di tadau baino’.
Naamot dilo’, otumbayan i Hajiji MoU diti nopo ponimpuunan kumaa timpu kawawagu koburuon Sabah, miampai Kota Kinabalu kosili turianan kumaa tongo’ kakadayan suai id pogun diti.
“Inggisaman diti okon nopo ko’ kapanahak waya’ kumaa kakadayan agayo, nga nogi’ kumaa pototongkop Sabah. Miampai poposili Kota Kinabalu sabaagi hab digital om inovasi, kopongukab tokou kosiwatan montok pisokodungan mogisusuai siktor kaampai ponombuluyan, balajaran om pongindopuan.
“Iti koimbayat lobi kogumu’ kopoopuan labus, kopodsupu’ kosiwatan pakarajaan om mongingkaras rontob koposion mogigiyon tokou,” ka disio.
Id sunduk Koporintaan Pogun ka disio, soginumu’ RM41.75 riong pinoobi’ kumaa Komontirian Sains Tiknologi om Inovasi, Sabah Skills and Training Centre (SSTC) om Sabah Creative Economy and Innovation Center montok popoindalan kurusus komilaan boros, pintoriningan komilaan sains, tiknologi om inovasi, do toun tiso’.
“Iti kopiongoi di tonggungan koporintaan pogun montok manahak koposotolan kumaa ababayan pendigitalan kaampai komilaan sains, tiknologi om inovasi. Koporintaan pogun nga’ poposodia’ nogi’ soginumu’ RM10.5 riong sabaagi inggisaman pendigitalan Surupukaraja’ Koporintaan Pogun, do toun tiso’.
“Iti kaampai no sistem ponguludan intodonon tulun (SM2), koposindakan Portal om Surupukaraja’ Digital Sabah nogi’ inggisaman pomoruhang di suai i monokodung kosimbanon pendigitalan siktor koporintaan.
“Id inggisaman mongingkawas gulampot koonuan internet id pototongkod pogun, koporintaan pogun kipalan montok mamasang kogogonopan internet tiknologi Starlink id 300 kinoiyonon doid pototongkod Sabah i kakal amu’ po nakaanu internet do toun tiso’,” ka disio.
