Joniston Bangkuai
KOTA KINABALU: Parti Bersatu Sabah (PBS) monuridong puruankuasa montok monorisid atag piomungan miampai Parti Solidariti Tanah Airku (STARSABAH).
Luguan Kopointalangan PBS, Datuk Joniston Bangkuai minoboros, kootusan dilo’ winonsoi id mitingan Kounsol Akawas PBS di konihab, nosuushut pinibaabarasan amu’ pinotomod pialatan kopomuruanan goduduo parti idlo’ montok mongukab kopikikiraan piomungan.
Mitingan i nirikohon di ponowoli Presiden PBS, Datuk Seri Dr. Joachim Gunsalam dilo’ minanahak tonggungan momuruan puruankuasa’ dilo’ kuminaa di Puru Parlimen Tawau, Datuk Lo Su Fui.
PBS om STARSABAH di wulan Kaapat toun diti suminain Mamorandum Pihunungan (MoU) montok misokodung id koponoguangan pomilian agayo pogun (PRN), i maan pohoroo’ do wulan Kohopod toun tiso’.
Minggu’ nakatalib, Kounsol Momuruan Miampai (JLC) PBS om STARSABAH pinapaharo mitingan koduo montok monginggirot piuhupan diolo’, kaampai no mongilo tindikohon i kalansanan montok ungkakaton om mamalan palan kosudong.
“Puruankuasa’ dilo’, i puru dau kaampai pipiro luyar, monorisid do sunduk teknikal piomungan dilo’, o wookon,” ka di Joniston id iso’ kopointalangan di tadau baino’.
Minoboros isio, iso’ kawagu kootuson oponsol i winonsoi id mitingan dilo’ nopo pinopourut pomilian parti i pinatantu’ do toun tiso’ mamantad no PRN maan pohoroo’ do toun di miagal.
