Dr. Jeffrey miampai tombului apantang pinopowonsoi ababayan mongomot parai ponkotanda’ gimil kinopoimpuunan Ramai Kaamatan 2024 id Lintuhun Mogigiyon Ranau, Ranau di tadau baino’.
RANAU: Koporintaan minaganu mogisusuai inggisaman montok mongingkawas Rontob Kosukupan Tinan (SSL) lolobi no parai montok monginggirot po do kojominan takanon id pogun diti.
Boyoon Montiri, Datuk Seri Haji Hajiji Haji Noor minobooros, Koporintaan Pogun nokoponuridong Puruankuasa’ Ponguludan Akawas id nayatan Komontirian Pomutanaman, Ponginsadaan om Pomorunan Akanon (MAFFI) montok mibooboros om monoibau tongo’ kobolingkahangan ngaawi’ kapaampai komijominna taakanon.
“Iti sabab no do Sabah noondo diti kosigampot no do rontob kokusupan tinan soginumu’ 22.8 pihatus om i nopo lobi nga’ kakal tumalahan kumaa pangaba’ wagas mantad intodonon labus toi wagas import. Id timpu di miagal koyuon tawan i amu’ atantu’ kapanahak waya’ kumaa asil pomutanaman, kaampai no id pougn diti.
“Kohondot dilo’, di ko 17tw Kaapat katatalib, Kabinet Pogun nakaakun minanampasi kawagu Kotinanan Parai om Wagas Sabah sabaagi wookon mantad inggisaman montok mongingkawas kopolobusan om koumoligan taaakanon id pogun diti. Ilo’ po nogi’ nga’ sabaagi inggisaman koporintaan pogun mongingkawas rontob kosukupan tinan wagas.
“Suai mantad dilo’, panahakan ‘insentif’ Pongoroduan Ranahon Parai miampai kinooopian soginumu’ RM18 riong wookon inggisaman Nayatan Pogun Sabah id Lintuhun Mogigiyon Ranau, do hiti di tadau baino’. Teks boboroson disio binasa’ di Kumoduo Boyoon Montiri po nogi’ Montiri Pomutanaman, Ponginsadaan om Pomrunan Takanon Pougn, Datuk Seri Dr. Jeffrey Kitingan.
Boyoon Montiri minoboros, inggisaman suai i nanu kaampai no ponondulian tana’ ranahon nologos, kopoburuan tana’ otuu, kopomoruhangan ginumu’ injin pangaradu om pongomot, panahakan baja id rontob bobos akawas nogi’ panahakan subsidi padagangan parai kumaa koinsanai mongungusaha’ miampai kinopoobian RM5..16 riong.
Montok mongingkawas po do kopolobusan tanom, ka disio, koporintaan pogun maya’ komponi poinggompit koporintaan miagal Sawit Kinabalu nga’ tuminonggoi id pananaman parai miampai karalano’ kaawagu montok mongingkawas tanom om pangaba’ wagas nokoiyonon.
Ka disio, Sawit Kinabalu pinosodia’ kinoiyonon di kosudong kosuul no montok pananaman parai. Iti nopo nga’ sombohogian mantad inggisamn tokou om ogumu’ po i suai om poindalanon montok papatantu’ kopopolobusan nogi’ kojominan takanon id pogun diti.
“Kalansann ku nogi’ tongo’ papamanau siktor pomutanaman, pomutayaman om ponginsadaan, montok tumilombus mongingkawas kopolobusan asil montok poposodia’ pangaba’ takanon di korungod, kumaa mogigiyon om bobos oponsol nopo maganu koinsanai kosiwatan maya’ mogisusuai inggisaman i pinosodia’ do koporintaan pogun,” ka disio.
Karait pamaramayan Ramai Kaamatan, minoboros isio, karamaian dilo’ nopo nga’ iso’ karalano’ oponsol kumaa mogigigiyon Sabah, i ramaion tikid toun do wulan Mikat kosuul no mogigiyon KadazanDusun, Murut om Rungus.
“Ramai Kaamatan diti okon nopo ko’ kituduan monginggirot ‘silaturahim’ om pisompuruan id nayatan mogigiyon orukut tinaru om ugama’ nga nogi’montok popointalang kopongunsikohan di asil nomot di osonong,” ka disio.
Daamot dilo’, minoboros isio, koporintaan nokopoindalan mogisusuai inggisaman id koponguhupan mongingkawas rontob koposion om sosio ikonomi mogigiyon.
“Poingkuro po kakal haro boros-boros wookon tinimungan i aiso’ tinonggungan miampai papakadaada’ om papasala’ nunu nopo inggisaman osonong koporintaan.
“Otumbayaan oku mogigiyon babaino’ diti lobi kosukod om amu’ obingampawong. Pokionuon ku mogigiyon do tumilombus miampai koporintaan monimporon kaadangon nogi’ koburuon ikonomi montok koturunduson kopoburan id Sabah,” ka disio.
