Hajiji suminain plak kinopoimpuunan Kinopohimogonan Kinabalu UNESCO Global Geopark om kapamaramaian Jubli Intan Taman-Taman Sabah.
KOTA BELUD: Kinabalu UNESCO Global Geopark (KUGGp) kaanu manahak koundaran om kalabaion ikonomi kumaa oinsanan nayatan mogigiyon lolobi no kumaa kikiro 291,300 mogigiyon id tolu watas di poinggompit.
Miampai ginayo 4,750 kilometer pasagi’, KUGGp i kopuli do watas Kota Belud, Kota Marudu om Ranau, nga’ kopohompit nogi’ soginumu’ 423 kanmpung.
Boyoon Montiri, Datuk Seri Haji Hajiji Haji Noor minoboros, kinoimbulaion geopark diti kapanahak ogumu’ kosiwatan kumaa mogigiyon lolobi no id kopoingkawasan nindopuan maya’ ababayan ponombuluyan om kopomogompian koubasanan id koiyonon dilo’.
“Tantu no diti kapanahak koundaran agayo miagal kosiwatan pongindopuan, pakarajaan om ponombuluyan. Kinoimbulayon geopark diti kapanahak koundaran kumaa momumutanom parai id Kota Belud, momukabun piasau id Kota Marudu om momukabun kinotuan id Kundasang, Ranau.
“Wookon dilo’, nopo maya’ ponginsomokan miagal kosiwatan kapadagangan kumaa poliliput pomogunan i potilombus dino kopongingkawas ginumu’ kosuangon tutumombului kumaa koiyonon Geopark. Suai ko dilo’, ababayan balajaran om kopurimanan kumaa nubasan kopomogompian id koiyonon Geopark, kapanahak gatang pomoruhang kumaa asil pomutanaman.
“Koingkawason kogogonopan id koiyonon Geopark koowit kumaa koburuon piromutan ralan om kogogonopan ginumuan, i kopoinsanang momirangkat asil pomutanaman, suai ko’ kosiwatan pongindopuan miagal do ‘homestay’. Iti kapanahak kosiwatan pakarajaan wagu miagal do mogogowit tutumombului i tumpasan di tongo’ tangaanak nokoiyonon,” ka disio ontok pinopoimagon Ramai Kinopohimaganan KUGGp om Kinopoimpuunan Pamaramaian ‘Jubli Intan’ Taman-Taman Sabah id Dataran Kota Belud, do hiti di baino’.
Hajiji pinopoindalan ponokotanda’ kinopoimpuunan Kinopohimogonan Kinabalu UNESCO Global Geopark om kapamaramaian Jubli Intan Taman-Taman Sabah.
Boyoon Montiri minoboros, kinopohimaganan sabaagi geopark dilo nga’ iso’ naangayan di osonong montok Koporintaan Pogun id siriba’ inggisaman Hontolon Sabah Maju Jaya maya’ Komontirian Ponombuluyan, Koubasanan om Sandad Posorili’ pogun nogi’ Taman-Taman Sabah.
“Atalang kopio, Hontolon SMJ nopo kopiongoi di konsep Geopark om tantu’ no koiyonon diti kosili rubpuon Geo-ponombuluyan pomogunan do timpu obontol. Kohondot dilo’, tolu tingkananon geopark ilo’ nopo pomogompian intodonon sandad, koburuon kogogonopan om kopongimbulayan sosioikonomi mogigiyon koiyonon i mongingiyon id nokoiyonon diti, kiguno onuan koposotolan.
“Palan Koburuon Geopark Negara 2021-2030 nga’ naramit nogi’ mantad Komontirian Ponombuluyan, Koubasanan om Sandad Posorili’ Pogun Sabah. Potilombus dino owiton tokou montok pogibabarasan id Nuludan Kabinet Pogun Sabah montok koonuan kookunan potilombus dino aanu romiton guno do Koporintaan Pogun,” ka disio.
Kohondot dilo’, nunsub disio oinsanan bohogian lolobi no mogigiyon id pososorili’ Geopark diti do miuhup miampai koporintaan momogompi’ tataba’ pogun diti mantad raagon di bohogian aiso’ tinonggungan.
“Iti mantad no kinopongokunan nopo diti nga’ iso’ po naangayan di kirait kopio kumaa pomogunon kosuul no pogun diti id inggisaman momogompi’ sandad posorili’ dau nogi’ koponguludan po’ompus do koiyonon geopark i haro gatang sompomogunan.
“Iti nopo nga’ tataba’ pinuawang Sabah montok do gompion tokou om gunoon sabaagi posunduran koburuon ikonomi kosuul no id siktor ponombuluyan montok koonuan koundaran di po’ompus mantad dilo’,” ka disio.
Kinabalu geopark nookunan do Kotinanan Balajaran, Sains om Koubasanan (UNESCO) id Paris di ko 24tw Kolimo 2023.
