KOTA KINABALU: Koporintaan pogun papaanjur Pamaramaian Krismas Nayatan Pogun Sabah id Padang Merdeka, do hiti, mimpuun ko 16 gisom ko 19tw kohopod om Duo diti.
Kumoduo Boyoon Montiri III po nogi’ Montiri Pomorunan, Pongindopuan om Padsakaian, Datuk Ewon Benedick i po nogi’ Ponorikohon Puruankuasa’ Induk pamaramaian dilo minoboros, montok kumoinsan nogi’, kapamaramaian Krismas i pogulu diti poonjuron do Dewan Bandaraya Kota Kinabalu (DBKK) miampai piuhupan Sabah Council of Churches (SCC) sinimbuat sabaagi karamaian id nayatan pogun.
Minoobros isio, pongonjuran diti kopokito koukaban om tonggungan koporintaan pogun id siriba’ kopomuruanan di Datuk Seri Haji Hajiji Haji Noor id kosokodungan pamaramaian kararamaian kougamaan.
Kapamaramaian diti pohimogonon di Molohingon Agayo Pogun Sabah, Tun Musa Haji Aman do ko 16tw Kohopod om Duo 2025, naamot ramai pomupusan pohimogonon di Boyoon Montiri do ko 19tw Kohopod om Duo 2025.
Uhu pamaramaian toun diti, “Pengharapan Damai Dalam Kasih” (Hope For Peace In Love), poposotol gatang pisompuruan, piuludan, kopogiisaan om sopipantang id nayatan rayat Sabah i mogisuai tinaru om ugama’, kopiongoi di angkabon Sabah First.
Suai ko’ mogisusuai ponuang sinasawat, pohoroon nogi’ o Moginakan Rayat (Jamuan Rakyat) i kopohompit 100 mongungusaha’ mantad nayatan tongo’ mongiingindapu’ nokoiyonon i nosili mangangaba’ mogisusuai ponit taakanon sabaagi sokodung koporintaan kumaa pongindopuan mikro om okoro’.
Kohondot dilo’, Ewon magalap koinsanai rayat Sabah tumindapou manahak gatang om rati kumaa karamaian diti.
Kointalangan kotilombus karait ababayan noulud pamaramaian aanu maya’ media sosial pinotomod di Datuk Ewon Benedick om Komontirian Pomorunan, Pongindopuan om Padsakaian Sabah, DBKK nogi’ Koupisan Kopointalangan Pogun Sabah.
