Nizam i minongobi’ di Boyoon Montiri nonuan kopointalangan Projik LSS Q-Solar katalib minongobi’ di Boyoon Montiri pinopowonsoi ramai sumungkad projik dilo’ id Jalan Timur, Kubota, Tadau di tadau baino’.
TAWAU: Koporintaan pogun tumilombus monginggirot tonggungan dau kumaa koburuon ginoris atatap maya’ kinopoimpuunan Projik Solar Kitukuran Agayo (LSS) Q-Solar Tawau, i pikikiro kapalabus 15 megawatt (Mwac) ginoris oburisi’ dumontol koompokon 2026.
Boyoon Montiri, Datuk Seri Haji Hajiji Haji Noor minoboros, projik kiwaya’ akawas id kinoiyonon kiginayo lobi 45 ekar dilo’ tinuridong maya’ piuhupan kosudong pialatan Qhazanah Sabah Berhad (QSB), Qhazanah Energy Sdn. Bhd. (QESB) om Qsolar Tawau Sdn. Bhd. (Qsolar).
Ka disio, projik solar dilo’ suai ko’ kosili posiau agayo kaadangon ginoris id koiyonon Tisan Kosilahon pogun diti, nga’ kointalangan nogi’ inggisaman po’ompus koporintaan pogun id koposodiaan ekosistem koburuon ogirot om kopiongoi di inggisaman poposili Sabah sabaagi momuruan ginoris aanu monginwagu.
“Yati’ okon nopo ko’ manalasai kobolingkahangan pangaba’ lotirik, lolobi id Tisan Kosilahon, nga minggisom monuridong timpu dumontol ginoris di oburisi’, aadang om kiginoris atahan,” ka disio id Ramai Sumungkad Projik LSS Q-Solar (Tawau) Sdn. Bhd. id Jalan Timur, Kubota di tadau baino’. Teks boboroson disio binasa’ di Monguhup Montiri kumaa Boyoon Montiri, Datuk Nizam Abu Bakar Titingan.
Boyoon Montiri minoboros, kopongimbulaian ginoris 15Mwac mantad projik diti nopo nga’ laang ogirot kumaa kapaadasan sistem grid Sabah, i noondo diti kakal adalaan tumalahan kumaa kopongimbulaian ginoris mantad disel om gas sandad.
“Projik diti koponginggirot ginoris sistem grid pogun, mongingkuri’ katalahanan kumaa bahan tapui om id timpu di miagal kapagadang kopoikidan ginoris pialatan Tisan Kotonobon om Tisan Kosilahon,” ka disio.
Hajiji minoboros, kopoindalanan projik diti nopo nga’ kopiongoi di palan induk ginoris pogun, ilo’ nopo nga’ Sabah Energy Roadmap and Master Plan (SE-RAMP), i nosili puralan sondikoton timpu anaru montok kosimbanon siktor ginoris Sabah.
Ka disio, kopoburuan projik diti nga’ koowit koundaran ikonomi kumaa mogigiyon koiyonon, okon nopo ko’ id sunduk ponuridongan om kopoopuan, nga ngoi’ koponsupuan kosiwatan pakarajaan om koburuon ‘kapasiti’ nokoiyonon.
Ka disio, fasa ponuridongan, kopoindalanan karaja’ om koponginsonongan kabun solar diti pikikiro kopongimbulai kosiwatan pakarajaan, naamot karaja’ ponuridongan om surupukaraja’ sokodung kopohompit kuntiriktor om mangangaba’ nokoiyonon id Tawau.
“Tangaanak wagu nokoiyonon nga’ onuan pintoriningan pinotomod montok mongulud om monginsonong sistem solar diti. Iti kopokito do projik diti okon ko’ kikoyuon naamot nopo, nga’ kituduan monuridong kapasiti nokoiyonon timpu anaru,” ka disio.
Tumanud disio, id sunduk kopoundolihan tiknologi, koburuon komilaan om kogompitan mitilombus rayat Sabah id siktor ginoris otomou nga’ kosili posunduran kumaa kosunion ikonomi di lobi ‘progresif’ om kopotonggoi toinsanan.
Hajiji nminongomi po nogi’ do projik diti sabaagi timpu kolimpuunon kumaa kosimbanon landskap pomorunan ginoris id Sabah, kosuul no Tisan Kosilahon.
Minamarayou po nogi’ isio tonggungan aparagat QSB om QESB i tumilombus popoindalan mandat sabaagi kotinanan kopoopuan kohunung pogun miampai monokodung katatapan koporintaan om monguhup kumaa koburuon ginoris atatap id Sabah.
“Papasanang rayat nopo nga’ tonggungan koporintaan noondo diti, om kalansanan ku projik diti aanu momongo tumanud timpu nogi’ kapanahak waya’ osonong kumaa rayat om pogun diti,” ka disio.
