Dr. Joachim tuminabi’ om monongkirumo dilo mogigiyon kampung ontok kinorikotan id Lintuhun Kg. Sumbilingon.
RANAU: Koporintaan Gabungan Rakyat Sabah (GRS) id timpu limo toun diti tumilombus tumopot popoindalan mogisuusai ababayan i koposotol do kotundunan om koburuon ‘modal insan’ nogi’ kasasanangna rayat id pototongkop pogun.
Kumoduo Boyoon Montiri i po nogi’ Puru Lintuhun Undangan Pogun (ADUN) Kundasang, Datuk Seri Dr. Joachim Gunsalam minoboros, wookon tingkananon koporintaan pogun nopo nga’ kosuuln o id balajaran.
“koporintaan Sabah pinopointutun Ponguhupan Tusin Koporojistoran IPT (BUDI) miampai ‘one-off’ kiginumu’ RM2,000 kumaa susumikul nayatan ijazah om RM1,500 montok susumikul diploma toi matrikulasi.
“Suai dilo’, tikid sikul nga’ karamit ponguhupan RM3,000 montok popoindalan kaparagatan toi momoli kogogonopan,” ka disio ontok minoboros id ababayan Lansanon Miampai Rayat id Lintuhun Kampung Sumbilingon, do hiti, di songkonihab.
Koporintaan pogun nga’ minomoruhang nogi’ kopoobian Sikulasip Koporintaan Pogun Sabah (BKNS) mantad RM51 riong kuminaa RM128 riong toun diti sabaagi tonggungan monginggirot kosiwatan balajaran tanak Sabah.
Dr. Joachim (kaapat, wanan) minamaramit foom ksoompuruan Parti Bersatu Sabah ontok pinapaharo kotombuluyan om ruminuba’ mogigiyon Kg. Tanid.
Dr. Joachim minongomi po nogi’ koposodiaan Walai Mesra SMJ sabaagi iso’ inggisaman pomuwalaian di osonong kumaa rayat di momoguno, om nogi’ lobi kosonong ko’ mantad ngaawi’ di skim nokopogulu.
Minoboros iso, asil koporintaan pogun nga’ nokoposurat nogi’ do kinoinsawaton agayo gisom somok kosigampot RM7 bilion id suang timpu limo toun pointonod pomorintaan di Boyoon Montiri, Datuk Seri Haji Hajiji Haji Noor.
“Nunu i kopoondos, Sabah noondo kaanu somuli’ lobi kagayo nung piadangon di limo no pihatus royalti petroleum. Maya’ SMJ Energy Sdn. Bhd., nakalantoi tokou sumanganu 25 pihatus koponsolon id Kogogonopan Gas Asli Cecair Tarapung doros tisan rahat (ZLNG) id Sipitang asil pinibatosan miampai PETRONAS,” ka disio.
Projik kigatang USD3.1 bilion dilo’ pikikiro kapanahak waya’ agayo kumaa koburuon ikonomi pogun kopiongoi di angkabon Sondikoton Sabah Maju Jaya (SMJ), ka disio kawagu.
Minoboros isio, Projik Sabah Ammonia Urea (SAMUR) id Taman Pomorunan Tumau om Gas Sipitang nga’ nokopongimbulai nogi’ ogumu’ kosiwatan pakarajaan kumaa rayat nokoiyonon, potilombus dino nokouhup kumaa kosunion ikonomi nokoiyonon.
“Nung koyuon koinsawaton asil diti kotilombus, id suang timpu limo toun dumontol kalansanan tokou Sabah kopongingkuri’ katalahanan kumaa kopoobian Pisompuruan, lolobi no montok koburuon labus kakadayan,” ka disio pinopointalang.
Kohondot dilo’, pinokianud isio rayat do tumilombus monokodung kopomuruanan Boyoon Montiri om Koporintaan GRS montok papatantu’ kotilombuson koinsanai koundaran di masaan om maan poindalano’.
Dr. Joachim (koonom, gibang) guminambar pongingitanan miampai komulakan om oinsanan i nokotindapou id pinialaan mutusoikol lasak.
Dr. Joachim pinoposotol nogi’ do koporintaan pogun id siriba’ GRS tumilombus miuhup miampai koporintaan Pisompuruan montok poposiau komogoton pogun do poinpuli.
Kohondot dilo’, rinamit osonong disio kinapawaladan Palan Malaysia Ko-13 (RMK-13) di Luguan Montiri di songkonihab, i tumanud disio kopiongoi di kogunoon otopot koburuon id Sabah.
“Posuulon tokou kakal kumaa limo haal agayo ilo’ nopo nga’ koburuon kogogonopan labus kakadayan miagal talun-alun, pangaba’ lotirik, waig oborisi’, koponginsonongan sikul laid om kopoingkawasan kogogonopan kolidasan.
“Maan paagalan, ponuridongan kolinik kolidasan di gunoon kopio id koiyonon poonsokid miagal Mukim Kaingaran i kiharo ginumu’ mogigiyon di akawas,” ka disio.
Nokotindapou nogi’ id ababayan dilo’ Monunurat Pulitik disio, Yubidi Gompoyo nogi’ sitaf Unit Lansanon Koburuon Mogigiyon DUN Kundasang.
Nokopogulu Dr. Joachim ruminuba’ mogigiyon Kg. Tanid ontok minooi intong gereja SIB do hilo’ om di doun sodopon, i Dr. Joachim pinopoimagon kinopoungkoyutan pialaan mutusoikol lasak (Motor Cross) om pinisahapan mimbuul komulakan Kg. Sumbilingon.
