Hajiji om i Shamsul Azri om naalap suai guminambar miampai rinibuan pakakaraja’ koporintaan pogun om Pisompuruan i nokotindapou id Ababayan Jelajah Taat Setia MADANI Pogun Sabah.
KOTA KINABALU: Koporintaan pogun pinopolombus tonggungan ogirot montok tumilombus papagaras kapatahakan surupukaraja’ koporintaan nogi’ popoinggayo koundaran koburuon kumaa koinsanai rayat maya’ ponginsomokan Malaysia MADANI.
Boyoon Montiri, Datuk Seri Haji Hajiji Haji Noor pinoposotol do kukumaraja’ koporintaan nopo nga’ toruntud kumaa kalantaion koburuonon pogun om kopoindalanan katatapan ngaawi’ koporintaan, kohondot dilo’ tonggungan diolo’ toririmo patanggayan do tinonggungan, kinopulokison om sunduan di akawas.
“Rayat mamaso poingintong. Pogogoyuon, kobooboroso’ om koponompuanan tokou kumaa rayat kopokito sistem kapatahakan koporintaan do noondo diti.
“Kohondot dilo’, pakakaraja’ koporintaan mositi’ do momuginawo di prinsip ngaawi’ MADANI – Kogiroton, Kasasanangon, ‘Daya Cipta’, Mamantang, Kotumbayaan om Kolisihan – okon ko’ maan nopo do slogan, nga id pogogoyuon om nubasanan karaja’,” ka disio id Ababayan ‘Jelajah Taat Setia MADANI Pogun Sabah’ id Longkod Konvensyen Sompomogunan Sabah (SICC) do hiti, di tadau baino’.
Nokotindapou nogi’ i Monunurat Pogun, Tan Sri Shamsul Azri Abu Bakar i pinapatahak pason kumaa puru surupukaraja’ koporintaan Sabah sabaagi wookon mantad ababayan nasional Jelajah Taat Setia MADANI.
Hajiji tinanud di Shamsul Azri pinopoindalan kinapatayangan video Malaysia MADANI kopihondot Ababayan Jelajah Taat Setia MADANI Pogun Sabah.
Ka di Hajiji, pisokodungan ogirot id pialatan koporintaan pgoun om Pisompuruan nokopogowit mogisusuai inggisaman montok kasasanangon rayat Sabah, kaampai no Ababayan MADANI Rakyat 2024: Sayangi Sabah i nokoimbayat somok 485,000 tombului.
Pinonuridongan 219 Komuniti Madani Sabah miampai kinopoobian RM657,000, Inggisaman Ehsan@KUSKOP id tolu watas tingkananon ilo’ nopo nga’ Kota Belud, Kota Marudu om Kudat suai ko’ mogisusuai pogibabarasan om forum balajaran montok popoinggayo kopomorotian Malaysia MADANI.
Id nayatan pogun, pinosotol di Hajiji do koporintaan tumilombus papatahak mogisusuai koyuon ponguhupan, kosuul no kumaa tinimungan B40 om susumikul, wokon nopo Ponguhupan Koporojistoran IPT (BUDI), Ponguhupan Komputer (BAIK) om subsidi pontuludan (GRS-SUBFLY) kiginumu’ RM600 kumaa susumikul Sabah i balajar id Semenanjung om Sarawak.
Iti suai ko’ Toluod Mahasiswa Pinsingilaan Akawas Suang Pogun (SENTOSA), soginumu’ RM300; Ponuridongan 3,000 unit Walai Mesra SMJ kigatang RM250 riong om Ababayan Sentuhan Kasih Rakyat (SYUKUR) kopohompit ponguhupan tusin tunui RM300 sombulan mintonod kolimpuunon toun gisom koompokon toun kumaa di 100,000 Luguan Suang Walai Mosikin om mosikin adala’an (miskin tegar) id Sabah.
Karait do kopoburuan ‘modal insan’, pinopoilo isio do kousinan Sikulasip Koporintaan Pogun Sabah rinuhangan miampai agayo mantad RM55 riong di 2022 kuminaa RM128 riong do toun 2025.
“Sokodung kumaa tangaanak Sabah montok mongoput balajaran okon nopo ko’ haal do balajaran, nga nogi’ kopoopuan timpu anaru montok mongimbulai lansanon timpu dumontol om ginoris karaja’ di kiginoris tumopong,” ka disio.
I Hajiji minokinau nogi’ di 21,989 pakakaraja’ koorintaan pogun om 126,677 pakakaraja’ koporintaan Pisompuruan id Sabah do sumili ‘popoinsanang’ kumaa rayat id kapatahakan kointalangan katatapan om kopoindalanan inggisaman koporintaan.
“Porikoton pason koporintaan gisom nayatan siriba’, pologoson o rayat do koilo do koporintaan okon ko’ mamalan nopo nga’ pinopoindalan ogumu’ inggisaman koburuon montok kasasanangan pogun om rayat. Surupukaraja’ di patahakon mositi’ otimpas, opulokis om kitonggungan,” ka disio.
Nunsub nogi’ disio oinsanan rayat Sabah do popoindisan pisuayan pulitik om tumilombus monginggirot pisompuruan montok komogoton pogun.
“Kaadangon pulitik nopo nga’ posunduran kumaa komogoton. Kanou tokou no oinsanan lumaang poinsogulu id sunduan pogisokodungan, poposuul pisompuruan om koponginwoguan tonggungan montok timpu dumontol Sabah di lobi kabantug,” ka disio pinoposotol.
