Haji Hajiji Haji Noor
KOTA KINABALU: Gabungan Rakyat Sabah (GRS) pinoposotol ningkakaton dau do parti ngaawi’ nokoiyonon mositi’ sumili ponokotukod osuul id kopomuruanan koporintaan pogun Sabah, montok papatantu’ kopomuruanan karati koyuon otopot, koubasanan nogi’ kogugunoon rayat id pogun diti.
Boyoon Montiri po nogi’ Ponorikohon GRS, Datuk Seri Haji Hajiji Haji Noor minoboros, GRS poingigit kumaa ‘prinsip’ do Sabah apatut porintaon di parti ngaawi’ nokoiyonon, sundung pia do amu’ popoindisan tongungan om koponsolon parti nasional id palan karaja’ piuhupan pulitik di lobi kosinggawa’.
“Nung kootusan pohimagon Pakatan Harapan (PH) om Barisan Nasional nopo montok misokodung id Pomilian Agayo Pogun obontol, nga’ GRS poinsodia’ montok tumanding mimpoopori om moningkanan piuhupan miampai parti ngaawi’ nokoiyonon suai di sopihunung,” ka disio id kointalangan di tadau baino’.
Pinosotol disio, nunu-nunu pisandalaan mantad prinsip dilo’ okito sabaagi laang i magada’ angkab kogumuan rayat Sabah.
“I nopo inggisaman do GRS nga’ kaadangon pulitik om kasasanangan rayat montok timpu dumontol Sabah,” ka disio.
Ka di Hajiji, koporintaan pogun do noondo diti kiguno tumilombus inggirotan tu’ koowit ilo’ kaadangon om mongobi’ do pisokodungan i koowit kumaa ginaras koporintaan Perpaduan id nayatan Pisompuruan.
Ka disio, popoindisan angkab nokoiyonon id sunduk pulitik Sabah nopo nga’ amu’ kopihunung di kopurimanan rayat id nayatan siriba’.
Kohondot dilo’, ka di Hajiji, GRS papaharo mitingan kopomuruanan id timpu toruhai montok papatantu’ sondikoton piomungan dilo’ dumontol Pomilian Agayo Pogun do obontol.
“GRS nga’ papaharo nogi’ pibarasan pinotomod miampai parti ngaawi’ i monuridong koporintaan pogun do noondo montok maganu pomusarahan om ningkakaton diolo’,” ka disio kawagu.
