Hajiji miampai di Anwar om tongo’ lansanon suai id Ababayan Pitimungan Perdana Rakyat.
KOTA KINABALU: Koporintaan Pogun tumilombus gumura’ otimpas monokodung tongo’ katatapan koburuon Sondikoton Sabah Maju Jaya (SMJ) i kopiongoi di sunduan angkab Malaysia Madani, ka di Boyoon Montiri, Datuk Seri Haji Hajiji Haji Noor.
Ka disio, Malaysia Madani lumansan pomogunon Malaysia kotilombus koburu’, kitonggungan akawas id nayatan pomogunan om koguli’ kosili pomogunon di pantangon om tumboyoon.
Minoboros isio, koporintaan pogun miampai poinponu’ kotumbayaan, tumilombus kumaa toguang, popoindalan sondikoton pogun miampai moningkanan pipiro siktor oponsol i haro id Sondikoton SMJ kosuul no siktor pomutanaman, pomorunan om ponombuluyan.
“Alhamdulillah, kototolu siktor diti nokoposindak ikonomi pogun gisom nokoimbayat papaapu’ kumaa Sabah potilombus dino mongukab kosiwatan pakarajaan kumaa tangaanak nokoiyonon. Suai dilo’, manahak moningkanan tokou nogi’ montok popoburu’ modal insan om papagaras kasasanangan mogigiyon.
“Miampai sokodung nuludan Kabinet Pogun oinsanan palan om tongo’ katatapan aanu popoindalan, kopiongoi di Katatapan Sondikoton SMJ i nosili impohon kumaa koyuon komogoton om koburuon pogun Sabah,” ka disio id ramai Pitimungan Perdana Rakyat id Longkod Konvensyen Sompomogunan Sabah (SICC) do hiti di tadau baino’.
Ababayan dilo’ notindapou di Luguan Montiri (PM), Datuk Seri Anwar Ibrahim i po nogi’ Presiden Parti Keadilan Rakyat (PKR).
Hajiji minoboros, Sabah nosili rubpuon di wookon papaapu’ miampai minogowit gatang kopoopuan kosigampot RM12 bilion pointonod duo toun nakatalib, mantad no do koyuon kopomuruanan pomogunon di ‘dinamik’ nogi’ osuau mangangapu’ gisom Sabah miampai mitilombus nga’ nakaramit do koundaran dilo’.
Minoboros isio, rinibuan kosiwatan pakarajaan naanu pinopouyu kumaa tangaanak Sabah mantad no do kinosuangon tongo’ papaapu’ saalom om labus gisom Taman Pomorunan Kota Kinabalu (KKIP) om Taman Pomorunan Tumau om Gas Sipitang (SOGIP) noponu’, potilombus dino momoguno koporintaan pogun mogihum om mongintutun taman pomorunan wagu montok momogonop kogunoon om kinaparagaton siktor pomorunan id pogun diti.
“Gatang kopoopuan diti pikikiro koingkawas po do toun-toun obontol, tu’ ogumu’ po papaapu’ nokoiyonon om labus i pinopokito kororohian montok rumikot papaapu’ id Sabah,” ka disio.
Hajiji minoboros, asil piuhupan ogirot pialatan Koporintaan Pogun om Koporintaan Longkod, Sabah nakaanu pinopikogos piuhupan ‘strategik’ miampai PETRONAS mantad nokopikogos pibatosan Commercial Collaboration Agreement (CCA) i nakapanahak ogumu’ kosiwatan om koundaran kumaa Sabah, miagal kohompitan lobi agayo id piuhupan kopongukaban tumau om gas id Sabah.
Karait haal mosikin ‘tegar’ i osomok id ginawo PM, ka disio, koporintaan pogun kiangkab monoibau kobolingkahangan dilo’ do poinggonop, maya’ ponginsomokan osikap popouyu pakarajaan kumaa tinimungan dilo’ i kapaampai kogompitan pipiro kotinanan koporintaan, GLC, bohogian swasta kaampai tongo’ mangangapu’.
“Laang ‘proaktif’ diti nakalantoi pinopoinsiriba’ ginumu’ mosikin tegar id Sabah kuminaa do 1,147 Luguan Suang Walai (KIR) gisom tulan Koturu’ toun diti. Ponginsomokan miagal diti tilombuson tokou do popoindalan montok moningkod komosikinan tegar id Sabah. Nga’, iti nopo mosikin tegar. Nga’ ginumu’ mogigiyon i poinsuang id kategori mosikin kakal ogumu’ id Sabah i momoguno kopongobian po’ompus mantad koporintaan pgoun om Pisompuruan,” ka disio pinoposotol.
Ka disio, maya’ inggisaman di po’ompus om ‘agresid’ montok mongingkawas kosunion ikonomi, koporintaan mongukab tongo’ intodonon di wagu sabaagi pomoruhang kumaa intodonon poinharo mantad.
“Montok dilo’, koporintaan pogun mamaso mongukab kosiwatan Ikonomi Obulou (Blue Economy) ilo’ nopo nga’ kopongukaban tataba’ rahat sabaagi intodonon ikonomi wagu om susuai produk pomorunan i aanu wonsoiyon mantad dilo’.
“Sabah notutukan do Rahat Cina Selatan, Rahat Sulu om Rahat Celebes, kikosiwatan akawas montok kopongukaban om koburuon Ikonomi Obulou. Ontok tulan Kohopod diti, koporintaan pogun papaanjur seminar topong sompomogunan karait The Blue Economy, i pikikiro poimpuunon di Luguan Montiri,” ka disio.
