Anwar Ibrahim ontok tuminindapou Pitimungan Perdana Rakyat Keadilan Sabah id Longkod Konvensyen Sompomogunan Sabah id Kota Kinabalu di tadau baino’.
KOTA KINABALU: Sabah kiguno sopihunung miampai koporintaan Pisompuruan id Pomilian Agayo Pogun (PRN) obontol nung orohian no kokito koburuon di potilombus koindalan id pogun diti.
Ka do Utusan Malaysia, i Luguan Montiri (PM), Datuk Seri Anwar Ibrahim minoboros, orotian kopio disio koguugunoon id Sabah om pogun diti noiduanan ogumu’ id sunduk koburuon.
Mantad dilo’, ka disio, nung orohian kokito koburuon id pogun diti kotilombus oonuan kopomodulianan, koporintaan pogun Sabah kiguno miupakat miampai osonong miampai Koporintaan Pisompuruan.
“Mantad dilo’ paatagon ku, nombo-nombo momuruan Sabah nung monoguang pomilian agayo pogun, pologoson no do haro pisokodungan ogirot id pialatan pogun om Pisompuruan. Kaanu tokou monimbang, nung amu’ timbangon yati’ i oudukut,” ka disio id Pidato Perdana kopihondot Pitimungan Perdana Rakyat Keadilan, di tadau baino’.
Minoboros isio, Keadilan kiguno mungkakat id Sabah mantad dilo’, kosompuruan om tongo’ raan parti om tapang ngaawi’ kiguno ruhangan om poguraon mooi do Keadilan koitlombus agaras om agayo id pototongkop Sabah.
Ka disio, songkuro kogumu’ lansanon i manangod Koporintaan Perpaduan i oritan do amu’ ogonop Melayu, om isio sondiri’ nga’ komoyon amu’ opoduli’ do tulun Melayu om noondo roitan do mumbal manamong Sabah om Sarawak.
“Mantad no do kuasa’ do sumakai kou do ugama’, mantad no do kuasa’ do katama’ kou momopol tongo’ tulun Islam. Ilo’ koyuon id Semenanjung. Do hiti, mantad nopo do kuas’a, moboros yolo’ ‘kita hanya untuk Sabah’ (yati’ montok no do Sabah). Sabah hinombo? Sabah taukeh balak toi Sabah montok projik?
“Keadilan mositi’ tumungag montok mogigiyon Sabah. Pogun diti opuawang om kiharo kosiwatan agayo i noonuan do tataba’. Antad dilo’, pogun diti kiguno mongimbulai tongo’ mobi’ rayat i kitonggungan. Nunu koundaran dau do mogiodu tokou, isai i oundaran?,” ka disio minongudio.
Daamot dilo’, minomohulit isio ningkakaton do Koporintaan Pisompuruan amu’ oluhoi doid haal kobontugan pomogunon om nindikohon Sabah i po nogi’ somboogian mantad Malaysia.
Minoboros isio, soira’ Filipina minongulingad kawagu karait nindikohon Sabah, minonimbar isio haal dilo’ miampai poinponu’ ‘diplomatik’ montok manamong piromutan osonong id pialatan koporintaan Malaysia om Filipina.
Ka disio, sundung nuru’ pibarasan miampai osonong nga’, soira’ dilo’ do kopohompit di haal bantug pomogunon om nindikohon Sabah, aiso’ o ponimbangan.
