Dr. Joachim (kolimo, gibang), Mok (kolimo, wanan) guminambar pongingitanan miampai turu’ arkitek wagu toun 2024.
KOTA KINABALU: Kumoduo Boyoon Motiri II, Datuk Seri Dr. Joachim Gunsalam minongunsub Kotinanan Arkitek Malaysia (PAM) Sabah do tumilombus papatantu ababayan om inggisaman poinggompit wonsoiyon montok posunui komogoton om koburuon arkiter omulok Sabah.
Pinoposotol koponsolon posunui bakat tomulok om sukod dumontol id tinimungan ‘seni bina’, minoboros isio, timpu dumontol karaja’ seni bina om nogi’ Sabah id longon do sukod obontol.
“Nosili tonggungan sinakagon babaino’ diti do mangahak tongo’ arkitek omulok i ki’iman-imanon akawas, poposodia’ diolo’ di intodonon om kosiwatan i gunoon montok mimang buru’ om abantug,” ka disio id Ramai Makan Totuong Toun-toun ko-47 om Sodop Gaa’ PAM Sabah id Magellan Sutera Harbour, do hiti di songkosodop.
Dr. Joachim guminambar miampai tongo’ nakalantoi id kategori binaan Umum om Institusi, Sabah Art Gallery montok toun 2024.
Dr. Joachim po nogi’ Montiri Koporintaan Koiyonon om Pomuwalaian, pinopolombus tonggungan disio montok monokodung om popointutun tinimungan seni bina id Sabah. Minoboros isio, arkitek Sabah kapapanau otnggungan oponsol id kopoingkawasan naangayan koposion oinsanan mogigiyon Sabah maya’ ‘reka bentuk’ di osonong om panalasaian ‘kreatif’ diolo’.
“Seni bina okon i ko’ momonsoi no linimput, ilo’ nopo nga’ kopohompit ponuridongan mogigiyon tokou, momogompi’ tungkusan tokou om kopokito timpu dumontol dati’.
“Miampai kopogisusuaian koubasanan di ogumu’ om kinolumison sandad posorili’ di koimbayat, Sabah kikopotutan kaanu pomowonsoi di abantug i kopomogonop do kointutunan olumis dau.
“Kosunion om koburuon pogun mositi’ miadang miampai momogompi’ tungkusan tokou om mongumolig sandad posorili. Arkiter kapapanau tonggungan oponsol id koponigampotan piadangan diti, monsupu’ ‘struktur’ di kapaamung miampai oturundus di pososorili’ om koponumboyo’ kogugunoon mogigiyon tokou i mumu’-umu’.
“Kanou tokou momusorou nogi’ di tongo’ prinsip ginumuan i mangahak dati’ ilo’ nopo nga’ ginirot, kopodulian koubasanan om kohompitan mogigiyon. Prinsip ngaawi’ diti okon nopo ko’ monuridong linimput nga ngoi’ popokito kointutunan tokou sabaagi songinan pogun i pointootopot kumaa koburuon di kitonggungan om kopomogompian tungkusan poinsandad om koubasanan tokou,” ka disio.
Minanangkabayahan kumaa koinsanai arkitek wagu om mamaramit gaa’, minoboros isio, sunduan om tinonggungan diolo’ kumaa kobontugan id seni bina nokouhup mongingkawas rontob seni bina Sabah om nokopo’iliu ponokotanda’ rontob di akawas.
“Kaino dati’ tumilombus miuhup, ki’inovasi om magada’ pisuayan id seni bina. Mogiamung, kaanu tokou monuridong timpu dumontol hinombo tungkusan seni bina Sabah unsikohon om gatangon montok sinakagon obontol.”
Minamarayou nogi’ isio inggisaman PAM Sabah id kinopointutunan kobontugan om seni bina om posuni bakat.
Nokotindapou ii Presiden PAM, Ar Adrianta Aziz; Timbang Presiden PAM, Ar Ridha Razak; Luguan Potunud Lintutun Kakadayan Agayo Kota Kinabalu (DBKK), Sr Lifred Wong; Ponorikohon PAM Sabah, Ar Mok Juana Yu; Manganganjur Ababayan Makan Totuon Toun-toun PAM Sabah, Ar Justin Yong om Ponorikohon Manganganjur Gaa’ PAM Sabah, Ar Ezekiel Lee, nogi’ presiden om ponorikohon abaal poinpuru.
