Hajiji pinopoindalan ‘gimik’ kopoimaganan kopihondot Ababayan Sumungkad Tawau International Cultural Centre (TICC), id koiyonon ponuridongan TICC, Sabindo, id Tawau di tadau baino’.
TAWAU: Koporintaan Pogun noondo masaan mamalan mogisusuai projik ponombuluyan id mogisuai sunduk doid pototongkop Sabah, wookon inggisaman mongimbulai lobi po kogumu’ asil ponombuluyan wagu id pogun diti.
Boyoon Montiri (KM), Datuk Seri Haji Hajiji Haji Noor minoboros, inggisaman diti nanu montok monginggumu’ po do asil ponombuluyan i aanu pointangaon kumaa tutumombului kaampai no kopohompit koubasanan.
“Miagal id Tawau, Koporintaan popoindalan pipiro projik ponombuluyan miagal di pinaatag maya’ Komontirian Ponombuluyan, Koubasanan om Sandad Posorili’ pogun (KePKAS) montok popoburu’ po do siktor ponombuluyan id watas diti.
“Wookon dilo’, momonsoi songinan resort wagu id Tawau Hills Park i kapaampai chalet, waya’an mamanau gakod, kulam waig alasu’ om popoiyon Longkod Ponolidikan Bulukun. Suai dilo’, koporintaan maya’ KePKAS nga’ monginsonong nogi’ kogogonopan miagal Jeti Tawau i mogowit tutumombului mantad Tawau kumaa Semporna,” ka disio.
Tawau i po nogi’ waya’an sumuang tutumombului kumaa Taman Rahat Tun Sakaran i nointutunan id Semporna, pinoposurat soginumu’ 25,684 tutumombului suang om labus pgoun id timpu wulan Koiso’ gisom Kaapat katatalib.
Gisom babaino’ diti, haro 115 sinaru’ pontuludan tikid minggu’ miampai 20,200 korumpos indikohonon koporomut Tawau kumaa Kuala Lumpur, Johor Bahru, Kota Kinabalu om Sandakan.
Gisom ko 15tw Koonom toun diti nga’, haro 32 pontuludan siniwaan pinotomod mantad Nanjing om Guangzhou, China, kuminaa id Tawau,” ka disio ontok pinopoimagon Ababayan Sumungkad Tawau International Cultural Centre (TICC) id koiyonon ponuridongan TICC, Sabindo, do hiti di tadau baino’.
Karait do ababayan dilo’, ka di Hajiji, ponuridongan TICC sabaagi kointutunan wagu id Tawau, tantu’ no do kosili pongimbayat tutumombului kumaa watas dilo’.
“Mantad dilo’, ponuridongan TICC kotondu’ kopio timpu dau om tantu’ no do soira’ opongo, kosili ilo’ koiyonon pongonjuran mogisusuai kaparagatan koubasanan kaampai no Festival Koubasanan Sompomogunan Tawau (FKAT). Tantu’ no do mantad haro tongo’ pongimbayat ponombuluyan wagu diti, kouhup dati’ monigampot rikoton 3 riong tutumombului kumaa Sabah do toun diti.
“Tumanud nokosurat Kotinanan Ponombuluyan Sabah, soginumu’ 1,004 tutumombului nokorikot id Sabah gisom di wulan Koiso’ om Kaapat toun diti kopohompit 396,584 tutumombului sompomogunan om 607,371 tutumombului suang pogun. Koyuon diti kounsub kopio sabab id timpu wulan Koiso’ gisom Kaapat diti, pikikiro risit ponombuluyan nopo soginumu’ RM2.23 bilion.
“Ponuridongan longkod idit wookon posodiaan Tawau sabaagi kakadayan i bobos poingoros do longkod pogun pomogunan Indonesia i mundaliu kumaa Nusantara, i tantu’ no do kapasarok po do pidagangan om ponombuluyan id watas diti,” ka disio.
Naamot dilo’, linimput iso’ louting duo blok TICC dilo’ kosili koiyonon montok popointutun koubasanan oinggonopan nogi’ do mogisusuai kosusukupan wookon lintuhun konvensyen, pisuk seminar om mini teater.
