Hajiji Haji Noor
KOTA KINABALU: Kopongubasan Sains, Tiknologi, Inovasi om Ikonomi (STIE) id nayatan susumikul doid Sabah tilombuson papagaras montok mongimbayat kororohian diolo’ id kaganaan dilo’, ka di Boyoon Montiri, Datuk Seri Hajiji Haji Noor.
Ka disio, iti sabab no rontob kogompitan susumikul id kaganaan Sains, Tiknologi, Kejuruteraan om Matematik (STEM) lolobi no Sains Tulen, nokoinsiriba’ id pomogunon diti.
“Koporintaan pogun mintong pointopot koyuon diti sabab no do kiguno tokou poposodia’ modal insan kikomilaan akawas id kaganaan teknikal, sains om tiknologi montok momonu’ kopomogunaan pomorunan do timpu dumontol.
“Montok dilo’, koporintaan pogun momorikot 60:40 ilo’ nopo nga’ 60 pihatus Aliran Sains om 40 pihatus Aliran Sastera. Iti mantad no do kogompitan susumikul STEM do toun diti nokosigampot no do 28 pihatus. Kohondot dilo’, mogisusuai karalano’ pinoindalan montok papatantu’ osigampot rikoton diti,” ka disio id Ababayan Kinopoimpuunan Mobile Exhibition ‘Experiencing Sciene: Enlighting Innovation Tour in Sabah’ doid Longkod Pambasaan Buuk Pogun Sabah (PNS) Tanjung Aru do hiti di konihab. Teks boboroson disio binasa’ di Kumoduo Boyoon Montiri III po nogi’ Montiri Karaja’ Agayo, Datuk Ir. Shahelmey Yahya.
Hajiji minoboros, id nayatan koporintaan pogun, Komontirian Sains, Tiknologi om Inovasi (KSTI) minonuridong Palan Strategik 2022 – 2025 sabaagi puralan id kopoindalanan mogisusuai ababayan om inggisaman do papagaras ekosistem STIE id Sabah.
Tumanud disio, wookon ababayan i pinoindalan nopo Ababayan STEM Fiesta miampai 24 Upis Balajaran Watas; Karnival Sains Sabah; Kembara Sains Borneo om Ababayan Gaa’ Sains Sabah. Gisom noondo diti koinsanai 1,296 tinan sikul nakaanu koundaran mantad tongo’ ababayan di pinoindalan.
Shahelmey (tanga’) miampai Montiri Sains, Tiknologi om Inovasi, Datuk Dr. Mohd. Arifin Mohd. Arif (koduo, wanan), Konsul Jeneral Republik Rakyat China id Kota Kinabalu, Dr. Huang Shifang (koduo, gibang) ontok minooi intong pokikitanan
“Kalansanan ku mooi do KSTI, Koupisan Balajaran Sabah om koinsanai kotinanan poinggompit kaanu monigampot rikoton sokukuri’ 40 pihatus susumikul maganu kaganaan sains dumontol 2025 id pogun diti,” ka disio.
Ka disio, Sains, Tiknologi om Inovasi (STI) noilaan sabaagi iso’ mantad posunduran oponsol do poposiau kopoburuan sosioikonomi id Palan Malaysia Ko-12 (RMK12) om nogi’ Palan Kopoburuan Hontolon Sabah Maju Jaya (SMJ).
Minoboros isio, koposotolan kumaa STI sabaagi posunduran oponsol kopoburuan sosio ikonomi di lobi kosudong om dinamik kopiongoi di koyuon sompogunan, kaanu mongingkawsa toilaan, inovasi, sinonong koposion om kasasanangan mogigiyon.
Kohondot dilo ka disio, koporintaan pogun maya’ KSTI toririmo tumopot id inggisaman mongingkawas kopurimanan mogigiyon kumaa koponsolon STI kaampai no papagaras dilo’ do po’ompus timpu id Sabah.
Tumanud disio, pipiro pisokodungan nopikogos no miampai pipiro komontirian id nayatan Pisompuruan miagal do Komontirian Sains, Tiknologi om Inovasi (MOSTI), Komontirian Piromutan om Digital (KKD), Komontirian Kopoburuan Mongindapu’ om Koperasi (KUSKOP), Komontirian Intodonon Tulun (KSM) suai ko’ pisokodungan kosudong miampai kotinanan balajaran koporintaan miagal Univositi Malaysia Sabah (UMS) om Univositi Tiknologi Mara (UiTM), suai ko’ private.
Karait kokomoi Mobile Exhibition ‘Experiencing Sciene: Enlighting Innovation Tour in Sabah, ka di Hajiji, Sabah nopo nga’ pogun kumoiso’ id Malaysia om kotolu id Asia i pinopoindalan ababayan kembara pokikitanan sains ‘interaktif’ dilo’.
Ka disio, KSTI miampai sokodung China Science Technology Museum om Guangxi Science Technology Museum papaharo pamanahan pokikitanan interaktif sains dilo’ id 14 watas nopili’. Pisokodungan dilo’ koindalan solinaid tolu toun gisom ko 26tw Kosiam 2026.
“Pokikitanan dilo’ kirati kopio sabab koporintaan Republik Rakyat China nokopoindalan mogisusuai inggisaman om laang wagu id kaganaan STI, om id nindikohon ko-11 id Indeks Inovasi Global 2022. Koyuon diti pinopo’iliu diolo’ sabaagi kuasa’ agayo sains om tiknologi nointutunan pomogunan.
“Pokikitanan diti nga’ iso’ nogi’ laang KSTI poposuni kororohian susumikul kohondot STEM id pogun diti, suai ko’ iso’ lugu’ id ababayan om Hontolon Sabah Maju Jaya. Mimang oku nogi’ do kosiwatan pisokodungan miampai China poinggoyoon kosuul no id kaganaan Balajaran, Pingludaan Teknikal om Vokasional (TVET) om susuai tiknologi do timpu dumontol,” ka disio pinoposotol.
