Dr. Joachim Gunsalam
KOTA KINABALU: Koporintaan pogun noondo diti id koponorisidan undang-undang montok manamong miampai poinhunung kopoindalanan Airbnb id Sabah.
Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam minoboros, ilo’ pikikiro kosili kasalaan mantad sunduk undang-undang montok Airbnb poindalnon id kondominium toi pomuwalaian mimpoopori sabab kiguno yolo’ sumili tinan pongindopuan.
“Sabaagi somboogian mantad koporintaan, opoduli’ ku do kinaantakan diti., montok doho’ koinsanai diti kopohimpit kooturan Airbnb om haro pipiro kooturan okoro’ (montok tonudon),” ka disio soira’ nuhot kokomoi kes tutumombului i minoniwa’ Airbnb nokokito komira’ poinlisok id suang pisuk diolo’, ontok rinubaan id ababayan kinopoimaganan Konsulat Republik Korea doid Plaza Shell, do hiti, konihab.
Dr. Joachim kipomusarahan tongo’ popoindalan Airbnb kiguno nopo moniwa’ premis diolo’ kumaa tambalut toi tulun i otutunan diolo’.
Kopolobusan permit Airbnb okon ko’ id siriba’ kokuasaan Komontirian Koporintaan Koiyonon om Pomuwalaian, ka disio suminimbar.
Nunsub nogi’ disio tutumombului kumaa Sabah do momuking songkoduonon kilisin miampai poinuhung om nogi’ mamason di mongungusaha’ popoindalan pongindopuan diolo’ miampai abaal.
Komontirian Ponombuluyan, Kosonian om Koubasanan (MOTAC) mintong poinwagat totondos i winonsoi do misokoruhang mantad China dilo’.
Montiri dilo’, Datuk Seri Tiong King Sing minoboros, MOTAC Sabah om kotinanan poinggompit pokionuon maganu laang okodou kohondot totondos i pinalabus id media sosial Xiaohongshu i poinlongkod id Shanghai di ko 14tw Kosiam om talib dilo’ pinoilang do portal habar nokoiyonon.
