Hajiji suminain plak istiadat om poingintong i Yeo (wanan), Konsul Jeneral Korea Selatan id Kota Kinabalu, Joo Jung Cheol (koduo, gibang) om Dr. Joachim (gibang) katalib kinopoimaganan Konsulat Republik Korea do hiti di tadau baino’.
KOTA KINABALU: Boyoon Montiri (KM), Datuk Seri Hajiji Haji Noor minoboros, ababayan Sabah Malaysia Rumah Keduaku (SMM2H) i nintangan kawagu maan pawalado’ id Lintuhun Undangan Pogun (DUN) do oruhai diti.
Minoboros isio, ababayan SMM2H nosorisid montok poposili Sabah koimbayat kumaa tulun songkosuayan i orohian mundaliu do hiti.
“Kinorubpuon bakat om kabaahan kapanahak koundaran kumaa dati, kosuul no montok Ababayan Sabah Malaysia My Second Home (SMMH2H) dati’ i maan pawalado’ id Lintuhun Undangan Pogun do amu’ no alaid. Lumansan tokou kokito lobi kogumu’ bakat kigatang akawas kaampai no mantad Korea Selatan mundaliu kumaa Sabah,” ka disio.
Boyoon Montiri minoboros, Sabah noondo diti nosili walai kumaa kikiro 2,000 tulun Korea, i kogumuan diolo’ poingiyon id Longkod Pogun.
“Yahai pointopot no do nounsub kokito kinorikotan mogigiyon Korea i kakal otiu’ do hiti,” ka disio id kinopoimaganan upis Konsulat Republik Korea doid Kota Kinabalu id Plaza Shell, do hiti, di tadau baino’.
“Sundung do ginumu’ diti okoro’, agayo ginawo dahai di kinogompitan aparagat diolo’ id ikonomi pogun tokou. Miampai pointimung, nakapanahak yolo’ do waya’ di agayo, sabab ogumu’ i minomili’ montok mongingiyon do hiti om minogowit nawawaya’an om komilaan di ogumu’ om mogisusuai,” ka disio.
Hajiji miampai di Yeo om tombului naalap di suai minongomus lukug montok moniib tabir ponokotanda’ kinopoimpuunan Konsulat Republik Korea id Kota Kinabalu.
Hajiji minoboros, ponuridongan Konsulat Republik Korea do hiti nopo nga’ laang oponsol potilombus dino id kopoinggoyoan piromutan diplomatik om konsular Korea Selatan sabba minggisom ilo’ do monuridong om mongingkawas piromutan songkoiyonon om sompomogunan.
“Malaysia om Republik Korea nakalaang osodu’, nokopiromut pisokodungan solinaid onom dekad nosuushut pinonuridongan piromutan diplomatik di 1960. Pointonod dilo’, nokosigampot yahai ogumu’ kinoburuon id pinialanan om pisoikodungan doid kogumuan kaganaan,” ka disio.
Di 2022, Republik Korea Selatan nokoulud sabagi tambalut pidagangan kowalu’ bobos agayo Malaysia om rikoton kopoudaran kowalu’ bobos agayo, naamot piromutan pidagangan id pialatan Sabah om Korea Selatan nokoinggayo miampai aadas, miampai kopoudaran pidagangan Sabah kumaa Korea Selatan nokoposurat RM4 bilion om nudar Sabah mantad Korea Selatan id RM900 riong toun nakatalib.
“Butia’ agayo diti do gisom noondo, tantu’ no, projik pamansaian kerajang tambaga’ SK Nexilis Korea Selatan kigatang RM4.2 bilion, iso’ mantad kopoopuan labus bobos agayo id Sabah,” ka disio.
“Kopoopuan kiwaya’ akawas dilo’ kapamatos okon nopo ko’ kosiwatan pakarajaan montok rayat Sabah nga nogi’ kapapanau tonggungan oponsol id kopoburuan pomorunan Sabah om monimban dilo’ sumili ikonomi ‘canggih’ i kotilombus manahak koundaran kumaa bohogian kikoundaran Korea Selatan om koiyonon diti,” ka disio.
“Haro ogumu’ Sabah om Republik Korea Selatan kaanu momoguno po ginaras dahai sopipoopori. Montok Sabah, koporintaan i potunudon di palan hontolon kopotundaan dahai, Hontolon Sabah Maju Jaya, om tonggungan dahai kumaa kosunion amu’ opiduo ginawo.
“Sabah poingukab montok pongindopuan, om orohian yahai kokito lobi kogumu’ mangangapu’ kumaa Sabah montok mongimbulai pibatosan pongindopuan sopikalantoi om piilangan,” ka disio.
“Miagal di noboros dahai, ponombuluyan id Sabah kotilombus koinggayo ogirot ontok 2023. Tulun Korea Selatan nopo nga’ mononoluod agayo, miamapi kinorikotan nokosurat id 95,966 (kinoinsawaton 2,705.2 pihatus) mimpuun tulan Koiso’ gisom Koonom 2023.
“Gisom wulan Kosiam 2023, Sabah piniromut di duo kakadayan – Incheon om Busan id Korea Selatan miampai 23 pontuludan om 4,409 tindikohon tikid minggu. Ounsikou oku Sabah kotilombus nosili ririkoton i ihumon do rayat Korea Selatan,” ka disio.
Hajiji minoboros, kinosunion ogirot nokopokito koinsanai kinorikotan tutumombului kumaa Sabah nokoposurat 1.2 riong kinorikotan mimpuun wulan Koiso’ gisom Koonom toun diti om nakapanahak RM2.45 bilion id risit ponombuluyan nopo nga’ ponokotanda’ osonong.
Minoboros isio, Sabah lumansan lobi kogumu’ pisokodungan miampai Konsulat Republik Korea montok papasanang pidagangan om kopoopuan nogi’ id kaganaan suai i kiharo koponsolon di miirad miagal pialanan koubasanan, teknikal om balajaran.
“Okunan dahai tonggungan pinotomod i papanahon do Konsulat id kopointutunan piromutan misulak om monoluod kumaa komogoton goduduo Sabah om Republik Korea,” ka disio.
Nokotindapou nogi’ i tongo’ Kumoduo Boyoon Montiri, Datuk Seri Dr. Joachim Gunsalam om Datuk Ir. Shahelmey Yahya, tongo’ Montiri Kabinet, Lansanon Akawas Korea Selatan kumaa Malaysia, Yeo Seung-Bae om upisor totuo kedutaan Korea.
