Jamawi (kotolu, gibang) pinopotunui ponokofail kumaa di Pengiran Saifuddin.
KOTA KINABALU: Datuk Jamawi Jaafar di tadau baino’ miampai pohimagon pinapatahak karaja’ ponorikohon Kotinanan Koburuon Kakadayan Sabah (SUDC) Sdn. Bhd. kuminaa di minonowoli disio i Pengiran Saifudin Tahir Petra id iso’ ababayan i pinapanau do hiti.
Jamawi, i poinsurupukaraja’ sabaagi Ponorikohon SUDC pointonod 2020, noondo diti Montiri Pomutanaman, Ponginsadaan om Pomorunan Akanon Sabah.
Id boboroson disio, minanangkabayahan isio kumaa di Pengiran Saifuddin mantad kinoposilihan dilo’ om minongunsikou kumaa oinsanan sitaf SUDC mantad no do kouhupan om sokodung diolo’ po’ompus limo toun disio poinsurupukaraja’.
“I nopo lobi koponsol nga’ pinopoindalan karaja’ dahai kumaa tulun ginumuan,” ka disio.
Jamawi (gibang) sinuau di Pengiran Saifuddin id kinorikatan doid ababayan dilo’.
Jamawi nga’ pinopolombus nogi’ kotumbayaan kumaa tonggungan om komogoton po’ompus SUDC id siriba’ pomuruanan di wagu.
Naamot dilo’, i Pengiran Saifuddin, 67, bagas Luguan Upisor Eksekutif SUDC, minonongkounsikou kumaa di Jamawi mantad no do kinouhupan om tinonggungan disio kumaa kotinanan dilo’.
Nokotindapou nogi’ i Monijor Agayo SUDC Anthony Undan Dumpangol, Luguan Upisor Eksekutif Datuk Afizal Aldin om sitaf do kotinanan dilo’.
Nokopogulu, i Jamawi tuminindapou mitingan miampai Sekretariat Sabah Maju Jaya binuruan di Luguan Upisor Eksekutif dilo’ i Datuk Haji (Datu) Rosmadi Datu Sulai id linimput Komontirian Pomutanaman, Ponginsadaan om Pomorunan Akanon (MAFFI).
