KOTA KINABALU: Komponi poinhompit koporintaan (GLC) nogi’ kotinanan okon koporintaan (NGO) nunsub mooi do mimbulai papatahak ponguhupan montok monokodung inggisaman Dapur Siswa i poindalanon do Univositi Malaysia Sabah (UMS), kosuul no montok monguhup susumikul amu’ songkuro kikosukupan mantad labus kakadayan.
Montiri Balajaran, Sains, Tiknologi om Inovasi Sabah, Datuk James Ratib minoboros, inggisaman i pinointutunan pointonod wulan Kohopod om Iso’ toun nakatalib dilo’ nakapanahak koundaran kumaa kikiro 3,500 susumikul, kopohompit duo kolej iyonon agayo UMS ilo’ nopo nga’ Kolej Iyonon Tun Fuad om Kolej Iyonon Tun Mustafa.
Ka disio, Dapur Siswa nopo nga’ iso’ ponginsomokan ‘praktikal’ id koponginggaanan tonggungan susumikul, lolobi no maso kos balanja’ masi om gatang taakanon nokoingkawas, potilombus dino kapatantu’ kotundunan mahasiswa kotilombus poinggompi.
“Koporintaan pogun tumopot papatantu’ kotilombuson ababayan diti om popoilo kumaa pipiro GLC nogi’ komponi kikosukupan do tumonggoi monoluod, i potuu id kogogonopan ahata’ taakanon toi ponguhupan kousinan,” ka disio ontok pinapaharo kotombuluyan kuminaa duo Dapur Siswa UMS do hiti.
Nakaampai nogi’ id kinotombuluyan dilo’ i Timbang Canselor UMS, Profesor Datuk Dr. Kassim Mansur nogi’ tongo’ upisor totuo univositi.
Sabaagi tanda sokodung kolimpuunon, pinopoilo i James do pipiro GLC id siriba’ komontirian disio nangatan umampai id inggisaman diti, suai ko’ toluod disio sondiri’ soginumu’ RM30,000 montok papalantoi kopoindalanan Dapur Siswa dilo’.
Inggisaman Dapur Siswa UMS pinalan nogi’ do paraladon kumaa kampus UMS id Labuan om Sandakan, kopiongo di angkab koporintaan pogun montok papatantu’ kotundunan koinsanai mahasiswa id Sabah kotilombus poinjamin.
