PENAMPANG: Ponuridongan Premis Tamu Desa nopo nga’ kointalangan do tonggungan koporintaan id kopogorisan pongindopuan mikro, okoro’ om gonsuhatan (PMKS), kosuul no id nayatan kampung, ka di Kumoduo Boyoon Montiri III po nogi’ Montiri Pomorunan, Pongindopuan om Padsakaian, Datuk Ewon Benedick.
Minoboros isio, wookon Tamu Dewa i tinuridong id Sabah nopo nga’ Tamu Desa Kampung Ramayah i pinoindalan do Komontirian Koburuon Pongindopuan om Koperasi (KUSKOP), toun di nakatalib.
“Tamu Desa diti nopo nga’ wookon kogogonopan i nupalai do lansanon kampung di maso ku momuruan KUSKOP om lumansan do kogogonopan diti aanu momoguno do poinggonop.
“Pinoilo oku do tomu id kampung diti pohoroon tikid tadau Koonom om torinaon do Puruankuasa’ Rukun Tetangga (KRT) Kampung Ramayah, om ginonuno poinponu’ di mongindapu’ okoro’ nokoiyonon montok popoindalan kaparagatan pidagangan.
“Kinoburuon diti kopokito kogogonopan i pinosodia’ do koporintaan kopiongoi di kogunoon kopio mongindapu’ mikro om okoro’ id nayatan kampung,” ka disio soira rinubaan magaganu habar katalib pinopoimagon Premis Tamu Desa Kg. Ramayah, kopihondot pamaramaian Krismas om Toun Wagu 2026, id Lintuhun Agayo kampung dilo’, do hiti di tadau baino’.
Ewon i po nogi’ Puru Parlimen Penampang pinoposotol do sabaagi Montiri Pomorunan, Pongindopuan om Padsakaian Sabah (MINDET) di wagu, tingkananon kopio nopo do komontirian disio nga’ popogoris PMKS sabaagi wookon posiau do ikonomi pogun.
“Portfolio padsakaian id siriba’ komontirian ku moningkanan kumaa ‘logistik’, kopohompit tolu kotinanan i pogulu diti id siriba’ Komontirian Karaja Agayo, ilo’ nopo nga’ Kotinanan Dodopiton Sabah (LPPS), Koupisan Koritapi Pogun Sabah om Koupisan Dermaga Sabah i noondo diti pino’iliu id siriba’ komontirian ku,” ka disio.
Suai dilo’, kitonggungan nogi’ isio sabaagi Exco kumaa pipiro kotinanan Pisompuruan poinhompit padsakaian.
Nokotindapou nogi’, Monguhup Montiri kumaa Boyoon Montiri, Datuk Ceasar Mandela Malakun; Puru Lintuhun Undangan Pogun (ADUN) Moyog, Datuk Donald Peter Mojuntin; Presiden Kounsol Kakadayan Penampang, Noemi Dyena John om tongo’ lansanon nokoiyonon.
