Hajiji suminasi’ pinialanan dokumen pialatan di Luguan Upisor Eksekutif SEC, Datuk Adzmir Abd Rahman (wanan) om i Monijor Agayo Otuo Koponguludan Hidrokarbon Bersepadu, Koponguludan Petroleum Malaysia, Anuar Ismail.
KOTA KINABALU: Sabah Energy Corporation (SEC) Sdn. Bhd. pinopikogos iso’ po pibatosan oponsol miampai PETRONAS montok papasaga’ komponi pasanganu poinponu’ koporintaan pogun dilo’ do mangaba’ 150 riong kaki’ padu standard sangadau (MMscfd) gas sandad, 100 MMscfd montok kapamansaian om 50 MMscfd montok kopongimbulaian ginoris, miampai gatang pangaba’ pikikiro RM1 bilion sontoun kumaa Esteel Enterprise Sdn. Bhd.
“Pibatosan diti ponokotanda’ laang oponsol kumaa sondikoton kopoburuan timpu anaru Sabah, popointutun kosunion pomorunan om koumoligan ginoris nogi’ monsupu’ kosiwatan wagu montok poposiau komogoton Sabah.
“Kalansanan dahai kaanu monilombus pisokodungan miampai PETRONAS om maganu kokiraan koponsolon bobos osonong montok Sabah,” ka di Boyoon Montiri, Datuk Seri Haji Hajiji Haji Noor katalib suminasi’ pinialanan pibatosan id pialatan SEC om PETRONAS nogi’ SEC om Esteel id Menara Kinabalu do hiti di baino’.
Id pibatosan pialatan SEC om PETRONAS, komponi petroleum nasional dilo’ mangaba’ pomoruhang 104 MMscfd gas sandad kumaa SEC montok monokodung kogunoon pomorunan om ginoris Sabah.
Miampai kinoingkawasan pangaba’ gas sandad, PETRONAS noondo mangaba’ soginumu’ 379 MMscfd kumaa SEC.
Minongobi’ PETRONAS nopo i Monijor Agayo Otuo Koponguludan Hidrokarbon Terpadu MPM, Anuar Ismail, naamot Luguan Upisor Eksekutif, Datuk Adzmir Abdul Rahman minongobi’ SEC.
Minongomi pibatosan diti, Timbang Presiden Otuo MPM, Datuk Ir. Bacho Pilong minoboros, koposotol ilo’ do tonggungan ouli’ montok PETRONAS do poposodia’ panalasaian ginoris i aanu ponungkayanan i kouhup kumaa kosunion Sabah om monokodung pomogunaan ginoris di lobi poinggirot.
Tonggungan kumaa kopoindalanan pomorunan i bobos osonong, SEC monilombus waya’ osonong kapaatadan gas soginumu’ 98 pihatus om tumilombus mongingkawas kogoosan teknikal om kopulokison kopoindalanan dilo’ do poposiau ksounion id siktor ginoris.
Pikikiro oukaban do suku kaapat toun 2027 id kinoiyonon kiginayo 180 hektar, fasa 1 projik keluli otomou miampai kopoopuan soginumu’ USD 1.93 bilion (RM8.92 bilion), kopongimbulai 2,795 kosiwatan pakarajaan miampai mitilombus om kopomonsoi 2.5 riong tan bosi’ briket alasu’ di oburisi’.
Projik tolu fasa diti mogowit sumuang kopoopuan pikikiro soginumu’ US$4.39 bilion (RM19.6 bilion).
Loji diti minomili’ gas sandad sabaagi ejen pongingkuri’ om okon ko’ ‘kok’ om ‘arang batu’, mongingkuri’ kopoiduan karbon soginumu’ 70 pihatus om koposili dilo’ osiriba’ karbon, kiwaya’ om osonong kumaa sandad posori’.
Boyoon Montiri minoboros, iti kapanahak tanda’ kotumbayaan Sabah kumaa projik keluli otomou, i po nogi’ wookon kopoopuan i mongobi’ impohon kosunion ikonomi om karalano’ kopoburuan pogun.
