Marsya minanahak boboroson disio id Ababayan Kinopoimaganan Bohogian PBS Darau doid Zenia Steamboal and Grill, Sepanggar, di tadau Kotolu (26tw Koduo).
KOTA KINABALU: Nuludan kopomuruanan Parti Bersatu Sabah (PBS) tumilombus popokito tonggungan akawas id kopoburuan kopotutan rayat Sabah miampai kinopohimaganan kopomuruanan wagu PBS Bohogian DUN Darau.
Ramai i notindapou di lansanon akawas parti nogi’ puru ongouli’ diti ponokotanda’ iso’ laang kohunung id kopoinggirotan parti id kinoyonon i sasaru’ roitan sabaagi ‘hot seat’ id kaganaan pulitik pogun.
Ponowoli Presiden PBS i po nogi’ Kumoduo Boyoon Montiri II om Montiri Koporintaan Koiyonon om Pomuwalaian, Datuk Seri Dr. Joachim Gunsalam nga’ nokotindapou miampai di Timbang Presiden PBS, Datuk Johnny Mositun i po nogi’ Ponorikohon Mitingan Bohogian DUN N17 Darau, Luguan Tinimungan Komulakan, Dr. Christoper Mandut, om nuludan Puru Kounsol Akawas (AMT) PBS.
Marsya (kotolu, gibang) guminambar pongingitanan miampai di Dr. Joachim (kolimo, gibang) om puru PBS i nokotindapou id ababayan dilo’.
Id boboroson disio, Luguan Bohogian PBS DUN Darau, Dato’ Seri Marsya @ Norhaizah Abu Bakar pinoposotol tonggungan disio montok mogowit rolou rayat kumaa nayatan lobi kawas nogi’ papatantu’ koburuon po’ompus i kopohompit oinsanan nayatan mogigiyon.
“Mamatos oku do sumaan tonggungan diti miampai poinponu’ tinonggungan. Kotumbayaan i pinatahak kumaa doho’ okon ko’ iso’ koundaran montok sondiri, nga’ iso’ impohon montok mogowit lobi kogumu’ koundaran kumaa rayat, kosuul no id DUN Darau,” ka disio.
Pinokianud isio oinsanan puru parti tumilombus miiso’, monginggirot pisompuruan om mongingkodou nindikohon PBS sabaagi parti i pantangon id Sabah.
“Kopoburuan diti okon ko’ montok doho’, nga’ montok dati’ toinsanan! Amu’ korungod do mimboros nopo, nga’ nuru’ tokou maganu laang. Nung okon ko’ yati’, isai po? Nung okon ko’ noondo, soira’ po?” ka disio id boboroson dau i sinimbar miampai sunduan di tongo’ nongkotindapou.
Ababayan dilo’ nga’ nosili nogi’ do kosiwatan montok poposindak sunduan kopoburuan kumaa sukod wagu mooi do tumilombus yolo’ sumili lansanon di osonong do timpu dumontol.
Miampai kinorikotan kopomuruanan bobos akawas PBS om sokodung ouli’ mantad puru parti nogi’ mogigiyon nokoyonon, PBS DUN Darau noondo diti poinsodia’ do gumura’ montok komogoton sabah om kotundunan rayat dau.
