Hajiji om sawo, Datin Seri Hajah Juliah Salag guminambar miampai di Tun Musa om Toh Puan Faridah kopihondot Istiadat ‘Lafaz Sumpah’ Karaja’ Molohingon Pogun Yang di-Pertua Pogun Sabah Ko-11.
KOTA KINABALU: Koporintaan Pogun tumilombus minggisom om mogihum ralan montok popomogot Sabah montok no koundaran om kasasanangan rayat pogun diti, ka di Boyoon Montiri, Datuk Seri Haji Hajiji Haji Noor.
Kohondot dilo’ otumbayaan isio Sabah kotilombus karamit kotoronongon, kalantaion om koburuon id siriba’ dolundung Molohingon Pogun (TYT) Tun (Dr) Musa Aman, i Yang di-Pertua Pogun Sabah Ko-11.
“Angatan ku oinsanan lansanon om rayat id pogun diti do mogiuhup, miangkawot lihawa om misompuru kumaa koposiahan koburuon Sabah di koupusan.
“Otootopot do, i Yang di-Pertua Pogun nopo nga’ dolundung montok oinsanan rayat, ponokokitanan kobontugan pogun di kibantug nogi’ monginggirot pisompuruan om piuludan mogigiyon i orukut tinaru, ugama’ om kinoubasanan.
“Kohondot dilo’, kotinanan Yang di-Pertua Pogun di apantang diti, solilinaid do singguunan sabaagi ginirot pisompuruan oinsanan rayat om ponokokitanan kobontugan pogun Sabah,” ka disio kopihondot Istiadat ‘Lafaz Sumpah’ Karaja’ Molohingon Agayo Yang di-Pertua Pogun Sabah Ko-11, id Istana Seri Kinabalu, do hiti di baino’.
Hajiji nga’ pinopoilang nogi’ mogisusuai inggisaman om kinalantaion i nosigampot koporintaan pogun pointonod apat toun di nakatalib, kosuul no id inggisaman montok mononduli’ ikonomi pogun om papasanang rayat maya’ Palan Koburuon Sondikoton Sabah Maju Jaya (SMJ)
“Maya’ palan koburuon SMJ, koporintaan pogun nakalantoi minongingkawas gatang kopoopuan suai ko’ pinopouyu tongo’ kosiwatan pakarajaan kumaa tangaanak mamasok. Asil pogun nga’ nokoingkawas mantad no koponguludan kousinan pogun di osonong om nokopuhu asil somok RM7 bilion di toun 2024.
“Tilombuson tokou kinalantaion diti montok mamagampot naangaan lobi kabantug. Naangayan di kounsub kopio diti mantad no do asil karaja’ agaras om tonggungan akawas momumuruan koporintaan miampai tongo’ pakakaraja’ koporintaan sabaagi popogura’ kukumaraja’ koporintaan.
“Id sunduk suai, mantad pisokodungan om pogiuhupan ouli’ pialatan siktor koporintaan om siktor swasta pointonod pipiro toun potohuri diti, nokopogowit waya’ osonong id kosunion ikonomi pogun. Kinoburuon di kounsub nopo diti nga’ kopiongoi di sondikoton i pinoimpuun somok apat toun di nakatalib,” ka disio.
Hajiji minoboros, kinomogoton om kinasanangon rayat nga’ toririmo tingkananon koporintaan, kohondot dilo’ mogisusuai ababayan, inggisaman om ponguhupan pinatahak kumaa tinimungan porikatan, kosuul no tinimungan mosikin om mosikin ‘tegar’.
Suai ko ilo’ ka disio, tinimungan susumikul om yolo’ i kiangkab montok mongoput balajaran om pinsingilaan id nayatan kotinanan pinsingilaan akawas, nga’ amu’ adaan, hinombo do maya’ ababayan koburuon ‘modal insan’, koporintaan pinoposodia’ kousinan kos pinsingilaan montok diolo’ i kosudong.
“Koporintaan nga’ tumilombus nogi’ papatantu’ kopomogompian tataba’ sandad, toririmo momogompi’ gatang koubasanan om adat kinoubasanan oinsanan tinaru, nogi’ monilombus gatang pisompuruan om piuludan di haro mantad tungkusan. Sunduk koumoligan om kotoronongon ginumuan, tilombuson moningkanan, montok papatantu’ kasasanangan rayat,” ka disio.
Hajiji nga’ pinopolombus nogi’ panangkabayahan au’ gigina’ om pinopolombus kotiu’an ouli’ kumaa di Tun Musa, sabaagi Molohingon Pogun Sabah Ko-11.
“Kalansanan Tuan Yang Terutama Tun om Yang Amat Berbahagia Toh Puan Faridah Tusin nogi’ koinsanai puru paganakan koupusan, toririmo id siriba’ pongumoligan om awanadan Allah SWT, miampai kolidasan om kounsikahan di po’ompus,” ka disio.
