Arifin ontok pinapatahak pason dau.
MEMBAKUT: Sabah papagaras po do rontob komilaan Boros Inggilis id nayatan susumikul mimpuun toun diti.
Montiri Sains, Tiknologi om Inovasi, Datuk Dr. Mohd Arifin Mohd Arif minoboros suai ko’ moningkanan kumaa Balajaran Sains, Tiknologi, Injinior om Matematik (STEM) om Balajaran om Pintoriningan Teknikal om Vokasional (TVET), koporintaan pogun nga’ tumopot nogi’ id inggisaman mongingkawas rontob komilaan Boros Inggilis.
“I nopo maan tokou pagaraso’ id Sabah diti, momorikot oku do 2025 diti montok moningkanan kumaa TVET om STEM.
“Koduo, montok kapagarasan Boros Inggilis, id timpu toruhai diti lohowon ku Potunud Koupisan Balajaran mantad UMS, UiTM om talib dilo’ IPG, talib dilo’ pipiro abaal montok mokinongou taka atag diolo’ montok mongingkawas komilaan Boros Inggilis id Sabah.
“Mokianu tokou pomusarahan mantad Potunud Koupisan Balajaran om pipiro abaal poingkuro ralan montok mongingkawas komilaan susumikul id Boros Inggilis,” ka disio pinopointalang.
Arifin i po nogi’ Exco Balajaran pinopoilo bohogian disio nokopiboros miampai pipiro pensyarah nogi’ abaal mantad UMS kohondot di ponuridongan Longkod Kabaalon Winonsoi (AI) id pogun diti.
“Longkod diti momoguno kabaalon om posilihon tokou Sabah sabaagi iso mantad longkod AI tu’ Sabah pasanganu kosiwatan di agayo. Maha’ daa mantad haro Longkod AI diti kaanu tokou monguhup univositi, pinsingilaan akawas, tongo’ sikulan.
“Momoguno tokou komilaan AI id nayatan mio’ontong, susumikul o kosuul no om otumbayaan oku miampai kabaalon tokou toi komilaan tokou id AI kouhup id sunduk pakarajaan do timpu dumontol tu’ i monowoli do timpu dumontol iti no kaganaan AI,” ka disio ontok rinubaan media id Ramai Misuau PRISMA Puru Balajaran DUN N.31 Membakut doid Lintuhun Seri Wawasan, Pimping, doros hiti di tadau Koduo.
Angkab Sabah monuridong longkod AI pinahabar di Arifin id pinomupusan pibahasan Rang Undang-Undang Perbelakan (2025) 2024 id Lintuhun Undangan Pogun Sabah, di wulan Kohopod om Duo katatalib.
