KOPOINTALANGAN …. MAFFI nopo nga’ komontirian koduo i tinombului di Hajiji id kotombuluyan karja’a disio kumaa koinsanai komontirian pogun.
KOTA KINABALU: Boyoon Montiri (KM), Datuk Seri Haji Hajiji Haji Noor minonuhu’ Komontirian Pomutanaman, Ponginsadaan om Pomorunan Takanon (MAFFI) manahak koposuulan tinimungan mosikin adalaan (tegar) id palan karaja’ om kaparagatan dau sabaagi wookon mantad inggisaman monoibau komosikinan tegar id Sabah.
Minoboros katalib kinotombuluyan karaja’ disio kuminaa komontirian dilo’ doid Wisma Pertanian do hiti di tadau baino’, Boyoon Montiri minoboros, MAFFI amu’ kaanu momolihu tinimungan mosikin id pamalanan diolo’.
“Id siriba’ kointalangan eKasih gisom ko 18tw Kolimo toun diti, luguan suang walai mosikin tegar Sabah nokoinsiriba’ kuminaa 8,699. Kalansanan ku lobi kogumu’ inggisaman id siriba’ MAFFI i kopohompit diolo’. Mimang tokou papatantu’ diolo’ kalabus mantad komosikinan di kadala’ kopio,” ka disio.
Tumanud kointalangan apat koupisan om apat kotinanan id siriba’ MAFFI, minoboros i Hajiji, palan di haro mantad montok poposindak pomorunan pomutanaman, ponginsadaan om takaanon id Sabah kumaa toguang.
I nopo oponsol, ka disio, Kotinanan Parai om Wagas Sabah (LPBS) i pinolulus di kaawagu diti mositi’ poindalanon tosisikap montok mongingkawas rontob kosukupan tinan (SSL) takaanon id Sabah.
Boyoon Montiri mokianu komponi poinggompit koporintaan i kiharo tana’ di amu’ gunoon do poburuon montok pomutanaman, kosuul no parai miagal di pinonuhuan do Kabinet Pogun.
Minoboros isio, id haal diti, MAFFI kaanu manahak ponguhupan id koposodiaan intodonon di gunoon.
Nokopogulu, i Kumoduo Boyoon Montiri I po nogi’ Montiri Pomutanaman, Ponginsadaan om Pomorunan Takanon, Datuk Seri Dr. Jeffrey Kitingan pinopoilo do pinonuridongan LPBS, rikoton di pinatatap montok mongingkawas SSL Sabah kumaa 65 pihatus do 2030 om 100 pihatus do 2035.
Tingkananon LPBS nopo montok mongingkawas asil parai mantad pulampai 2.9 tan metrik kumaa turu’ tan metrik sonhektar dumontol 2030, popoburu’ rahanon parai nokologos montok momoruhang ginayo om mongukab ranahon parai wagu maya’ pisokodungan miampai GLC Pogun om kopoopuan swasta, ka disio.
Minoboros isio, kaganaan kuasa’ LPBS kopuli do kopolobusan lisin om permit popoudar om mongudar nogi’ pomolopotan om kapadagangan parai om wagas id Sabah.
Tongo’ montiri Kabinet, Monunurat Koporintaan Pogun, Datuk Seri Sr. Safar Untong om upisor totuo koporintaan nga’ nokotindapou.
