Hajiji miampai di Anwar om Kumoduo Luguan Montiri, Datuk Seri Dr. Ahmad Zahid Hamidi kopihondot Ramai Pomupusan Kongres Ikonomi Mamasok 2024 id Longkod Konvensyen Sompomogunan Putrajaya (PICC) id Putrajaya di tadau baino’.
KOTA KINABALU: Boyoon Montiri, Datuk Seri Haji Hajiji Haji Noor otumbayaan miampai inggisaman pulitik di akawas om sokodung ogirot mantad Koporintaan Perpaduan id nayatan Longkod, rikoton Hontolon Sabah Maju Jaya (SMJ) montok mongunsub kosunion ikonomi pogun om papasarok ikonomi mogigiyon Mamasok id Sabah, lobi kasanang monigampot.
Minoboros isio, nimpohon Hontolon SMJ i kiangkab papagaras siktor pomutanaman, pomorunan om ponombuluyan, kopiongoi di Tolu Tingkananon i pinaatag montok poposindak po do ikonomi Mamasok, ilo’ nopo mongimbulai kotinanan tana’ Mamasok, monuridong wakaf balajaran, kolidasan om kotundunan, om poposili pomorunan o pomutanaman.
“Ingkaa nogi’ i Onom Tingkananon Kosimbanon Kopogorisan Ikonomi Mamasok i pinointutunan id kongres diti, lolobi no Tingkananon Koduo om Kotolu ilo’ nopo Monombol Kalawason Kopoindalanan Katatapan om Monuridong Kaadason Pialatan Watas/Tinaru om Tinimungan, kosudong kopio timpu dau,” ka disio ontok minoboros kopihondot Kongres Ikonomi Mamasok 2024 i nakapanau id Longkod Konvensyen Sompomogunan Putrajaya, di tadau baino’.
Kopihondot dilo’, kalansanan di Hajiji nunu nopo kotontuan i aanu mantad kongres diti, maganu nogi’ do kokiraan di koponsolon mogigiyon Mamasok id Sabah.
“Lumansan oku nogi’, nunu nopo ponginsomokan di onuon montok papagaras ikonomi Mamasok Sabah, apatut karalano’ toi ponginsomokan dilo’ poinginanon id siriba’ kapanamangan kotinanan Koporintaan Pogun Sabah.
“Iti montok manahak koundaran kumaa Sabah montok mongulud om momuruan tongo’ ababayan koburuon sosioikonomi miampai poinsonong, kiwaya’ om poingulud,” ka disio.
Hajiji minoboros kopihondot Ramai Pomupusan Kongres Ikonomi Mamasok 2024 id Longkod Konvensyen Sompomogunan Putrajaya (PICC) id Putrajaya di tadau baino’.
Akawas nogi kalansanan disio do kopomuruanan pogun id siriba’ Koporintaan Perpaduan diti ototopot montok tumilombus mongobi’ konosipan tinaru Mamasok poliliput pomogunon, kaampai no id Sabah.
“Sabaagi pogun koduo bobos agayo id Malaysia, miampai ginumu’ Mamasok kosigampot gisom 90 pihatus mantad ginumu’ mogigiyon dau, yahai id Sabah kiharo angkab di akawas kopio montok umampai di koinsanai mogigiyon Malaysia mamaramit koburuon om komogoton ikonomi pomogunon.
“Iti okon nopo ko’ monokodung ikonomi id nayatan siriba’ Mamasok id Sabah nga nogi’ popoiliu impohon kumaa ombitanan koburuon di lobi poinpuli om po’ompus montok mogigiyon Mamasok. Id boros suai, kapagarasan ikonomi kosuul no montok Mamasok id Sabah, mositi’ no do kopiongoi di koburuon piromutan kogogonopan sabaagi kapagarasan poinbida’,” ka disio.
Minoboros isio, Koporintaan Pogun kiangkab montok monombol pisuaian komosikinan i alaid no do potoguang ogumu’ Mamasok id Sabah, om kiangkab mogowit kosimbanon kumaa kopision mogigiyon i lumansan do kopongobian, kosuul no i hilo’ id poingusuk.
“Amu’ yahai asaga’ do oiduanan, om toririmo dahai lumansan mooi do ‘kek’ koburuon aanu opogiilangan id iso’ panganakan agayo Malaysia. Kada’ siliho’ Rahat China Selatan dilo’ sabaagi popitongkiad toi kaantob kumaa komogoton om kasasanangan toinsanan,” ka disio.
Kopihondot po nogi’ dilo’, ka disio, visi Koporintaan Pogun nopo montok papatantu’ inggisaman kapagarasan ikonomi Mamasok Sabah poinginanon om kaanu kopongokunan kointutunan di poinpoopori montok Sabah id sunduk do Malaysia.
“Miagal di noilaan tokou, koyuon geografi nopo nga’ iso’ kaantob i koponginrulan do kopoindalanan koburuon om hal diti aantakan id Sabah. Ilo’ nopo ko’ koponginrulan kosunion ikonomi om kopongilaid karaja’ koburuon, nga nogi’ manapad do ababayan perekonomian nogi’ sosiol mogigiyon Mamasok, lolobi no id poonsokid.
“Suai dilo’, popoinggayo piromutan kogogonopan di ogirot nopo nga’ oponsol montok ikonomi Sabah, lolobi no id kopoingkawasan piromutan pialatan koiyonon poonsokid om longkod kakadayan. Iti okon nopo ko’ monokodung ikonomi nayatan siriba’ Mamasok id Sabah nga nogi’ kopo’iliu nimpohon kumaa ombitanan koburuon di lobi poinpuli om po’ompus montok mogigiyon Mamasok.
“Kohondot dilo’ otumbayaan oku miampai papagaras ikonomi Mamasok id Sabah maya koposodiaan pingludaan, balajaran osonong, kopoingkawasan pomogunaan digital om kousinan, nogi’ momogonop komilaan di gunoon, suai ko’ kogogonopan sabaagi kogunoon poimpahan, kapasaga’ diolo’ do kaanu tumopong id nayatan nasional nung amu’ pia id nayatan somopomogunan,” ka disio.
Luguan Montiri, Datuk Seri Anwar Ibrahim pinopoindalan ramai kinopoimaganan pongolimpupusan Kongres Ikonomi Mamasok 2024.
