Haji Hajiji Haji Noor
KENINGAU: Sabah momorikot mamagampot rontob koporojistoran (enrolmen) maso-maso susumikul id mato balajaran Sains, Tiknologi, Injinior om Matematik (STEM) soginumu’ 42 pihatus dumontol toun 2025.
Boyoon Montiri, Datuk Seri Haji Hajiji Haji Noor minoboros, noondo diti Sabah i nokoposurat enrolmen maso-maso susumikul STEM soginumu’ 28 pihatus, id koiyonon koduo nokotohuri id nindikohon nasional.
Minoboros isio, hal enrolmen nopo nga’ iso’ mantad kobolingkahangan intodonon i kiguno salasaion om miampai waya’ ababayan di po’ompus bohogian koporintaan nogi’ sokodung mogigiyon kaampai molohing, Sabah pikikiro kosigampot rikoton soginumu’ 42 pihatus rontob enrolmen dumontol 2025.
“Inggisaman diti kopiongoi di tonggungan Koporintaan Pogun i tumopot montok manahak balajaran bobos osonong kumaa mogigiyon Sabah, kosuul no kapaampai STEM id inggisaman mongimbulai modal insan di osonong,” ka disio id Ababayan Kinopoimaganan Longkod Sains Keningau doid Longkod Pambasaan Buuk Pogun Sabah Raan Keningau, do hiti di tadau baino’. Teks boboroson disio binasa’ di Kumoduo Boyoon Montiri I po nogi’ Montiri Pomutanaman, Ponginsadaan om Pomorunan Takanon, Datuk Seri Dr. Jeffrey Kitingan.
Hajiji minoboros, koporintaan toririmo momoduli’ di rontob kososodiaan sukod wagu monoguang kosimbanon pomgounan di apagon pikikiro, lolobi no kapaampai koyuon pakarajaan timpu dumontol sabab dumontol toun 2027 pikikiro 69 riong pakarajaan wagu kapaampai do STEM di osupu’, naamot 83 riong pakarajaan poinharo mantad tingkadan.
“Mogisusuai inggisaman kopoingubasan sains nga’ pinoindalan kapaampai sokodung miampai tambalut strategik mantad pogun om pisompuruan nogi’ kotinanan suang om labus pogun miampai tuduan montok mongunsub susumikul rumohian mato balajaran STEM potilombus dino orohian momili’ waya’an karaja’ id kaganaan dilo’.
“Miampai balajaran di bobos osonong kaampai minsingilo sains, tiknologi om inovasi, kaanu tokou monimban koyuyuon koposion rayat i tohuri nopo nga’ kouhup kumaa kalantaion om naangayan pomogunon kosuul no Sabah. Ilo’ nga’ kopiongoi nogi’ di Palan Koburuon Hontolon Sabah Maju Jaya (SMJ) i manahak koposotolan kumaa kopoburuan modal insan,” ka disio pinoposotol.
Ka disio, ponuridongan longkod sains sabaagi hab toilaan di ‘interaktif’, ‘inspiratif’, om ‘inklusif’ montok mogowit pinsingilaan sains kumaa rontob lobi kasawat, nopo nga’ iso’ inggisaman koporintaan i kituudan poposindak koburuon toilaan om tiknologi id pomogunon diti kosuul no id Sabah.
Tumanud disio, ilo’ po nogi’ nga’ iso’ laang i pinoindalan miampai angkab om visi di akawsa do koporintaan, sabab no do kopomogunaan kopio montok popoburu’ balajaran sains om tiknologi id nayatan rayat.
Hajiji minoboros, Longkod Sains Keningau i kigatang RM3.0 riong maya’ kinopoobian koburuon Palan Malaysia Ko-12, okon i ko’ songinan no linimput, nga’ kokitanan kinopinogoton om ginoris ‘kreativiti’ id ponudukan sains maya’ ponginsomokan di okon ko’ doun kinoubasanan, nga’ konsep ‘hands-on’, ‘minds-on’, ‘hearts-on’ i pinointutunan nopo nga’ iso’ koyuon kinosimbanon id koponudukan om kopinsingilaan sains.
“Inggisaman diti montok mongimbulai kororohian id nayatan susumikul, mogowit diolo’ kumaa kaganaan sains, tiknologi, injinior om matematik (STEM),” ka disio.
Ka disio, ponuridongan longkod sains diti nga’ inggisaman nogi’ koporintaan montok manahak osiwatan aadas kumaa susumikul om mogigiyon id poonsokid. Ilo nopo nga’ laang kumaa popiadas rontob nawawayaan sains id nayatan susumikul montok papatantu’ aiso’ pisuayan nawawayaan om koiduan pialatan diolo’ i poingiyon id kakadayan om id watas poonsokid, ka disio kawagu.
“Iti nga’ koponuridong om kopongimbulai sinakagon wagu i okon nopo ko’ abaal id kaganaan STEM nga nogi’ kiginoris kreativiti id koponsupuan inovasi, sunduan ‘kewirauhasaan’ id popoinggayo asil sinupuan, potilombus dino kapanahak waya’ ikonomi di agayo kumaa koiyonon nokoiyonon kosuul no watas Keningau,” ka disio kawagu.
