Dr. Joachim (poindikau, tanga’) guminambar pongingitanan miampai Puru Kounsol Akawas parti katalib minonorikohon mitingan Kounsol Akawas parti, konihab.
PENAMPANG: Presiden Parti Bersatu Sabah (PBS), Datuk Seri Dr. Maximus Ongkili minongoput timpu surupukaraja Tiim Kukumaraja’ Presiden gisom ko 31tw Kotolu 2024.
Kumoduo Presiden PBS, Datuk Seri Dr. Joachim Gunsalam minoboros dilo’ ontok minonorikohon mitingan Kounsol Akawas parti i pinapanau doid longkod upis dilo’ id Donggongon, do hiti di konihab.
Wookon hal di pinogibabarasan id mitingan koompokon toun diti nopo nga’ pisokodungan do PBS om Parti Solidariti Tanah Airku (STAR) montok timpuunan miampai goduduo dilo’ miuhup manganjur Walai Poingukab Krismas.
Mitingan po nogi dilo’ nga’ montok popoimagon puruankuasa’ diti buruanon goduo di Monunurat Agayo sopipoopori parti.
Mitingan dilo’ miniboros nogi’ ponimbanan kawawagu diti kumaa koundangan parti i kakal amu’ po nakaanu kolulusan mantad Koupisan Porojisrotan Kotinanan Malaysia.
Mantad no diti, mitingan pinapatantu’ do montok toun 2024, nubasanan maso-maso ilo’ nopo nga’ papaharo mitingan agayo tikid toun monotk oinsanan raan om bohogian maan tilombuso’ mimpuun wulan Koiso’ gisom Ko’onom om limunduk nopo nga’ Kongres Agayo i pohoroon do tohuri ontok toun tiso’.
Mitingan dilo’ minomohulit nogi’ do tonggungan PBS id kosokodungan poinponu’ Koporintaan Pogun Gabungan Rakyat Sabah-Pakatan Harapan (GRS-PH) i buruanon di Boyoon Montiri Datuk Seri Haji Hajiji Haji Noor.
PBS nga’ papaharo nogi’ do ‘retreat’ saalom montok poposodia’ Puru Ngaawi’ Kounsol Akawas om tongo’ Luguan Bohogian do kolimpuunon toun tiso’ sabaagi posodiaan kopikikiraan pomilian agayo posopungon.
Kapt:
