Hajiji minomupus pibahasan montok Koupisan Boyoon Montiri id DUN Sabah.
KOTA KINABALU: Boyoon Montiri, Datuk Seri Haji Hajiji Haji Noor pinopoilo do kakasahan pangaba’ lotirik id Sabah nokopokito koyuon (trend) kinoingkurian atalang nosusuhut kinopoindalanan mogisusuai laang ‘mitigasi’ om panamangan po’ompus.
Ka disio, tumanud kointalangan Sabah Electricity Sdn. Bhd (SESB), pulampai ‘jidar’ pinoopi’ toi ‘reserve margin’ do noondo diti id rontob 12.4 pihatus om pikikiro koinsawat kumaa 20 pihatus dumontol tulan Koturu’ 2025.
“Kinoingkawason diti oponsol montok papatantu’ kaadangon sistem pangaba’ lotirik om mongilag ‘catuan’ i kapanahak waya’ kumaa rayat om ikonomi pogun,” ka disio ontok minomupus pihabasan montok Koupisan Boyoon Montiri id Pitimungan Lintuhun Undangan Pogun (DUN) Sabah, konihab.
Hajiji nga’ pinopoilo nogi’ do rontob catuan pangaba’ lotirik nokoinsiriba’ miampai atalang nung piadangon toun nakatalib.
“Maan poiradan, di tulan Kotolu2025 inggapat no catuan naantakan nung piagalon di 13 di wulan miagal toun nakatalib – ilo’ nopo kinoinsiribaon soginumu’ 69 pihatus,” ka disio.
Ingkaa po nogi’ di tulan Kaapat 2025, insan no kinaantakan catuan di nokosurat, nung poiradon di intolu di tulan Kaapat 2024 – kinoinsiribaon soginumu’ 67 pihatus.
Sundung ingkaa, pinointalang di Hajiji do kogumuan kakasahan toun diti mantad no do kobolingkahangan teknikal id labus kopikikiraan.
“Wookon intodonon agayo nopo kakasahan kapangabaan gas do PETRONaS di kaawagu diti i nokoowit kinokurion kapasiti kopongimbulaian,” ka disio pinopointalang.
Suai dilo’, kakasahan naamot naantakan nogi’ id loji solar Tadao, Kudat nosusuhut koyuon tawan oluhung adalaan minonigowo nokoowit kinatagakon ginoris do misondikot.
Haro nogi’ kinaantakan id Pencawang Suangon Agayo Segaliud di wulan Kaapat 2025, nga’ laang otimpas bohogian Grisd System Operator om SESB nakaanu minongingkuri’ waya’ kakasahan kuminaa do sanjaam no.
Minoboros i Hajiji, koporintaan pogun mintong kopio kobolingkahangan kakasahan lotirik om minaganu laang timpu oniba’ om timpu anaru.
“Mogisusuai laang mitigasi interim om ‘fast track’ di pinolulus do Kounsol Ginoris Sabah i minogiboboros do intolud di toun 2024,” ka disio.
Wookon laang dilo’ kaampai no minomoruhang kapasiti kopongimbulaian wagu nogi’ mongingkawas kopulokison kapatahakan ginoris mantad loji kumaa moomoguno.
Ka disio, inggisaman diti oponsol id koponoguangan kopokionuan pangaba’ lotirik di mumu’ gumu’ gama-gama’ koburuon aparagat pogun.
Koporintaan nga’ masaan nogi’ monginggirot kogogonopan ginoris miampai poinpuli kaampai kopoopuan id ginoris aanu monginwagu.
“Kogogonopan ginoris di ogirot nopo posunduran oponsol montok kosunion ikonomi om kasasangan rayat,” ka disio pinoposotol.
Hajiji minanahak jominan do koporintaan tumilombus miuhup oronit miampai SESB om kotinanan poinhompit montok papatantu’ pangaba’ lotirik aadas om korungod id pototogkop Sabah.
“Amu’ tokou mimang rayat kotilombus oinggoris do kakasahan di miguli-guli’. Koporintaan ototopot manalasai kobolingkahangan ginoris miampai poinpuli om poinggirot,” ka disio.
Kalansanan nogi’ disio oinsanan bohogian kaampai Puru Lintuhun Undangan Pogun om moomoguno mamarati kaantaban teknikal do poinharo, nga’ otumbayaan inggisamani masaan poindalanon kopogowit asil id timpu toruhai.
