Hajiji (kotolu, wanan) ruminamit tandamato mantad di Luguan Monunurat Komontirian Suang Pogun, Datuk Haji Ruji Haji Ubi katalib Mitingan Puruankuasa’ Miampai ESS Zone Bilangan 1 Toun 2024 id Menara Kinabalu, Kota Kinabalu, di tadau baino’.
KOTA KINABALU: Koporintaan pogun tumilombus manahak sokodung poinponu’ om kouhupan ogirot kumaa Koiyonon Koumoligan Pinotomod Tisan Kosilahon Sabah (ESSCom) om tinimungan koumoligan id kapantalaban pongundoronok kosugkuan araat songkosuayan om militan, karaaton (pomusarahan poindala’), korubpuan modidikot aiso’ kasagaan (PATI) om kopomusalaan padarapas piwolitan kosuul no id Zon Oumolig Sabah Kosilahon (ESSZone).
Boyoon Montiri, Datuk Seri Haji Hajiji Haji Noor minoboros, Komontirian Suang Pogun (KDN) om ESSCom o kosuul no tumilombus aparagat papaharo tongo’ operasi montok manamong koumoligan om kapantangon pomogunon mantad osugkuan do bohogian i aiso’ tinonggungan om momigangau kotoronongon pogun Sabah.
“Kopiongoi di kapagarasan sondikoton Sabah Maju Jaya (SMJ), kosokodung oku kopio di tongo’ inggisaman koponginsonongan kogogonopan, aset, intodonon om kogugunoon agensi koumoligan, popogirotkuasa’an om kotungoligan montok papatantu’ rontob kopoindalanan om kososodiaon id rontob bobos akawas,” ka disio id Mitingan Puruankuasa’ Miampai ESSZone Ko-1 Toun 2024, id Menara Kinabalu, do hiti, di tadau baino’.
Hajijij om Montiri Suang Pogun, Datuk Seri Saifuddin Nasution Ismail minonorikohon mitingan dilo’. Nokotindapou nogi’ i Monunurat Koporintaan Pogun, Datuk Seri Sr. Haji Safar Untong om Luguan Monunurat Komontirian Suang Pogun, Datuk Haji Ruji Haji Ubi; Luyar Agayo Pogun, Datuk Brenndon Soh om Monunurat Hal Suang Pogun om Ponolidikan, Koupisan Boyoon Montiri, Datuk Haji Ag. Shahminan Datuk Haji Ag. Sahari.
Ka di Hajiji, sabaagi somboogian mantad Koiyonon Kosunion Asean Kosilahon Brunei Darussalam-Indonesia-Malaysia-Filipina (BIMP-EAGA), Sabah id kinoiyonon di kosudong kopio miampai Tisan Kosilahon Sabah sabaagi hab kosunion ikonomi wagu tu’ osomok di EAGA di suai.
Ka disio, koponuridongan longkod pomogunon wagu Indonesia, Nusantara id Kalimantan Kosilahon nga’ kopomoruhang ‘merit’ om kobontugan Sabah.
“Kinoburuon ngaawi’ osonong diti apatut onuon kosiwatan tu’ kotimungon tulun om nimburu’ kumaa Borneo kouhup kosunion ikonomi pogun diti.
“Koporintaan otumbayaan papaapu’ suang pogun om sompomogunan kaanu mongukab ‘sub-rantau’ diti miampai pidagangan lobi 70 riong moomoguno om koinggayo,” ka disio.
Minoboros isio, ESSCom nosili pungaran koumoligan (brand) i nosili tiintangan do bohogian labus pomoguonon montok momonsoi kopoopuan.
Ka disio, pisokodungan ‘strategik’ id pialatan koporintaan pogun om Pisompuruan maya’ KDN gunoon kopio montok papatantu’ palan koburuon ikonomi Sabah aanu popoindalan poinsonong.
Minoboros isio, koporintaan pogun pointotopot papatantu’ koyuon koumoligan id piwolitan maritim kopuli koiyonon ruludan kopulouan, posolinsig om baang nogi’ piwolitan tinan kosuul no id ESSZone id koyuon di osonong om pointamong.
Hajiji minoboros, iti mantad no do ginayo maritim id Sabah i po nogi’ kouhup kumaa kopongimbulayan koburuon ikonomi kumaa Malaysia sbaaagi koiyonon kowoigan di amu’ koidu’ mantad pongundoronok koumoligan nogi’ koulalaho’ kopomusalaan padarapas piwolitan.
“Mantad dilo’ piuludan ogirot id pialatan koporintaan pogun om KDN maya’ koinsanai agensi id siriba’ dau miagal do ESSCom toririmo pogiuhupon montok monoibau tongo’ kobolingkahangan dilo’ id Sabah o kosuul no om id Malaysia do pointongkop maya’ tongo’ laang ‘proaktif’ om ‘strategik’ montok momogompi’ bantug, mongilag om monoibau pongundoronok koumoligan mantad kotilombus aantakan do timpu dumontol,” ka disio pinoposotol.
Hajiji lumansan maya’ Mitingan Puruankuasa’ Miampai dilo’ koponigampot piupakatan id kopoingkawasan po do kopoindalan karaja’ koumoligan om ababayan papasanang mogigiyon, potilombus dino mongingkawas kotumbayaan mogigiyon id koiyonon diti.
Daamot dilo’, io’ Hajiji dii Saifuddin tuminindapou nogi’ Mitingan Puruankuasa’ Akawas Ponguludan Tulun Songkosuayan Id Sabah (JPKWAS-INDUK) ko-1, Toun 2024 id Menara Kinabalu.
