KOTA KINABALU: Luguan Kopointalangan Parti Bersatu Sabah (PBS), Datuk Joniston Bangkuai pinapaatag do konsep PBS 2.0 sabaagi ‘visi’ atalang montok timpu dumontol parti.
Minoboros isio atag diti kiguno intangan sabaagi inggisaman wagu montok popoimulok parti i kiumur no d39 toun om monimban pomusarahan PBS sabaagi “parti tulun nolohing”.
“Kiguno ilo’ intangan sabaagi parti minomuruan inggisaman monugat tongo’ kopotutan pogun miagal di poinsurat id Pibatosan Malaysia 1963 om id Koundangan.
“Kiguno tokou momoguno poinsonong di susuyan om kokuasaan PBS sabaagi impohon ogirot do popoburu’ om popoinggayo po do rikoton nogi’ sondikoton parti,” ka disio.
Joniston minoboros dilo’ ontok pinopoilang pomusarahan disio karait ‘The Way Forward For PBS’ id Seminar Platform Politik Anak Muda PBS, di tadau Kaapat.
“Pikikiro norikot no timpu tokou monimbang PBS 2.0 sabaagi inggisaman montok otootopot popoimulok parti mooi do kotilombus kosudong, om kapatantu’ dati’ amu’ oiduanan nga’ momuruan id nubasanan pulitik di ‘inovatif’,” ka disio kawagu.
Joniston pinapaatag nogi’ mooi do Komulakan PBS momuruan inggisaman mamalan karalano’ di kosudong nogi’ aanu poindalanon miampai tuduan om rikoton i aanu monigampot id kopoimulokan parti.
“Sabaagi momuruan timpu dumontol PBS, puru Komulakan apatut id rulud toguang doid inggisaman monginggirot po do parti om mongimbayat lobi kogumu’ puru, lolobi no id nayatan sukod wagu,” ka disio.
Kipomusarahan isio do konsep PBS 2.0 kiguno mongobi’ tonggungan puru kumaa ponginwoguan, kopotonggoyan, om inovasi, kopiongoi di kogunoon om kopomuruanan maso-maso.
Ka disio kawagu inggisaman diti kiguno kopohompit karalano digital di koponokitopong, ponginwoguan karalano’ kimpin, kapagarasan komulakan om koonduan, om i bobos oponsol, kogompitan sukod mongungundi’ wagu.
“Okito ku PBS 2.0 sabaagi ‘call to action’ montok toinsanan puru. Ilo’ okon ko’ palan nopo nga’ popogura’ kumaa di lobi kiulinau montok parti tokou, om montok doho’, iti no ‘the way forward’ (ponginsomokan bobos osonong) montok timpu dumontol PBS,” ka di Joniston.
Kohondot dilo’, pinosotol disio koponsolon kogompitan aparagat mantad oinsanan puru montok papalantoi konsep diti hinombo do komulakan om koonduan koponguhup mamalan palan koponginwoguan di kiwaya’ montok parti.
Seminar diti notindapou di puru exco parti i binuruan di Luguan Tinimungan Komulakan Longkod, Christoper Mandut om tongo’ luguan komulakan bohogian.
