Dr. Joachim i minongobi’ di Boyoon Montiri Datuk Seri Hajiji Haji Noor pinopoimpuun Tadau Talun Sompomogunan 2023 Nayatan Pogun Sabah id Rainforest Discovery Centre (RDC) Sandakan, di tadau baino’, minananom kayu kopihondot ababayan dilo’.
SANDAKAN: Kopoburuan siktor kotolunan lolobi no kabun talun id Sabah amu’ apatut intangan sabaagi koowit do kapanagakan talun (deforestation) ka di Boyoon Montiri (KM), Datuk Seri Hajiji Haji Noor.
Ka disio, iti sabab no do poindalanon ilo’ tumanud palan kopoburuan kabun talun i pinoimagon om pinolulus do Koupisan Kotolunan, tumanud puralan di poinpuli mantad sunduk pongumoligan sandad posorili.
Tumanud disio, totondos bohogian atantu’ do kopoburuan siktor kotolunan id Sabah, lolobi no kabun talun nokopohompit do kinapanagakan talun di atalang nogi’ nokopongumpadan kolitupon talun nopo nga’ amu’ otopot.
Dr. Joachim i minongobi’ di Boyoon Montiri Datuk Seri Hajiji Haji Noor pinopoimpuun Tadau Talun Sompomogunan 2023 Nayatan Pogun Sabah id Rainforest Discovery Centre (RDC) Sandakan, di tadau baino’, ruminamit tanda’ mato mantad di Luguan Siktor Konservator Talun Sabah, Datuk Frederick Kugan id ababayan dilo’.
Minoboros isio do bohogian dilo’ apatut daa momonsoi ponorisidan kointalangan di lobi poinhunung om mamarati di komoyon koponguludan talun id Sabah.
“Koporintaan Sabah nokopongintutun do okooro’ koiyonon talun pinoopi’ i naraag (degraded) miampai ginawo okoro’ ko’ mantad 400,000 hektar montok tuduan dilo’, miagal di poinsuang doid Palan Karaja’ Kopoburuan Kabun Talun (2022-2036).
“Mantad sunduk di osonong, kopoburuan kabun talun nopo nga’ iso’ mantad karalano’ Koponguludan Talun Po’ompus (SFM) montok mononduli’ asil kolobusan talun di nokoingkuri, montok mongingkuri’ katalahanan pomorunan kokoyuan nokoiyonon kohondot pangaba’ balak mantad talun sandad, om papatantu’ intodonon pangaba’ kosusukupan ahata’ di po’ompus,” ka disio id Ababayan Kinopoimpuunan Tadau Talun Sompomogunan 2023 Nayatan Pogun Sabah id Rainforest Discovery Centre (RDC) do hiti, di tadau baino’.
Teks boboroson disio pinolombus di Kumoduo Boyoon Montiri II po nogi’ Montiri Koporintaan Koiyonon om Pomuwalaian Pogun, Datuk Seri Dr. Joachim Gunsalam.
Boyoon Montiri pinoposotol id sunduk koponguludan talun, Koporintaan Sabah toririmo pointopot montok monimporon 50 pihatus watas kolitupan talun pogun, kopiongoi di Katatapan Talun Sabah 2018.
Ka disio, noondo diti, Sabah kakal minonimporon 64 pihatus koiyonon olitupan talun pogun. Iti kopuli do 3,848,597 hetkar (52 pihatus) koiyonon i nokohimagon sabaagi koiyonon talun pinoopi’ om watas pongumoligan suai.
Tumanud disio, montok papagaras koponguludan talun pogun om mongumolig tataba’ oponsol dilo’, Sabah pinopohimagon gisom 1.9 riong hektar (26.9 pihatus) sabaagi Koiyonon Noumoligan Poinponu’ (Totally Protected Area) montok mamagampot rikoton 2.2 riong hektar toi 30 pihatus mantad ginayo pogun dumontol toun 2025.
Hajiji minoboros, Koporintaan Sabah masaan popowonsoi inggisaman koposudongan (rasionalisasi) guno tana’ montok tuduan kaadangon kopoburuan sosio-ikonomi om kopomogompian tonduli’ sandad posorili’.
“Kopiongoi dilo’, Koupisan Kotolunan Sabah masaan mamalan iso’ Palan Induk Talun (Statewide Forest Master Plan), i koposodia’ puralan palan karaja’ kohondot koponguludan intodonon talun montok timpu 25 toun do dumontol, montok koiyonon kitalun id poliliput Sabah.
“Maya’ Palan Induk Talun diti, koporintaan Sabah papatantu’ koinsanai Koiyonon Ekologi Osoding (Ecological Sensitive Area – ESA) pointatap oumoligan om timpu di miagal amu’ magada’ kopoburuan sosio-ikonomi di po’ompus montok kasasangan mogigiyon Sabah. Iti nopo kopiongoi di kopoindalan Hontolon Sabah Maju Jaya (SMJ) i wookon dilo’ pinapatatap kogunoon kopoburuan piromutan kogogonopan om kopoburuan otomou,” ka disio pinoposotol.
Sabaagi kopokitonan di piadangan kopotundaan sosio-ikonomi om pongumoligan intodonon sandad, Hajiji Minoboros, Koporintaan Sabah miampai sokodung United Nations Development Programme (UNDP) om Global Environment Facility (GEF) monogulu do kopoindalanan Ababayan Waya’-Waya’ Sistem Kopolobusan Takanon, Guno Tana’ om Koponondulian Gompi’ (Food Systems, Land Use and Restoration Impact Program – FOLUR IP). Ababayan diti kopohompit Koponguludan Lanskap Bersepadu kopuli do ginawo kikiro 2.1 riong hektar.
Tumanud disio, ilo’ kopongulud di palan om koponguludan guno tana’ id “Sabah montok manalob waya’ kopolobusan tumau sawit, suai ko’ monimporon koiyonon talun kigatang akawas, HCV (High Conservation Value) montok koundaran sandad posorili’ om kopoburuan.
Ababayan diti poindalnon id 12 watas id Sabah, om pikikiro kapanahak koundaran kumaa kikiro 56,000 tulun mogigiyon labus kakadayan.
Hajiji minoboros, sabaagi laang montok kopongimbulaian nindopuan wagu, Koporintaan Sabah minongukab do tongo’ inggisaman ngaawi’ i kaanu monokodung ababayan kopomogompian tonduli’ talun maya’ kosiwatan koonuan asil nindopuan okon ko’ mantad kayu (Forest Beyond Timber).
“Iti kaampai no tongo’ ababayan ‘rekreasi’ mantad talun, pambayaran surupukaraja’ eskosistem talun (Payment For Forest Ecosystem Services) om pidagangan karbon maya’ kopoindalanan ‘Reducing Emissions from Deforestation and Forest Degradation Plus’ (REDD+).
“Iso’ poiradan i okito tokou nopo nga’ kopoburuan kogogonopan id Rainforest Discovery Centre Visitor’s Complex diti i nokito nokoimbayat tutumombului mantad suang om labus pogun, i orhian do ababayan rekreasi kapaampai talun.
“Kopotundaan RDC Visitor’s Compleks diti nopongo minomonsoi di toun 2022 miampai ponguhupan teknikal om kousinan Komontirian Intodonon Sandad, Sandad Posorili’ om Kosimbanon Iklim, Malaysia (NRECC) kiginumu’ RM7 riong i nokopomoruhang gatang inggisaman Koporintaan Sabah id kopoinggarasan siktor rekreasi talun miampai kikonsep do balajaran sandad posorili’ om kopurimanan ginumuan,” ka disio kawagu.
