Mantad gibang: Tan Lee Fatt, Peto Galim om i Datuk Ruslan Muharam tuminaru id toguang do Tun Juhar, om poingintong i Hajiji, id Istana Seri Kinabalu.
KOTA KINABALU: Tolu monguhup montiri wagu tuminaru (angkat sumpah) id toguang di Molohingon Pogun, Tuan Yang Terutama Tun Juhar Mahiruddin id Istana Seri Kinabalu, do hiti, di tadau baino’.
Boyoon Montiri, Datuk Seri Hajiji Haji Noor minoboros, mantad kinoposilihan wagu dilo’, pinongunggaran monguhup montiri id poinharo mantad nga’ winonsoi.
“Kinoposilihan om pongunggaran monguhup montiri tadau baino’ nopo nga’ inggisaman po’ompus montok papagaras om popogirot kopoindalanan koporintaan,” ka disio.
Kinoposilihan monguhup montiri nopo nga’ montok minonuang duo karaja’ i niduanan di Datuk James Ratib, bagas Monguhup Montiri Pomutanaman om Ponginsadaan i noondo diti Montiri Kopotundaan Mogigiyon om Kasasanangan Mogigiyon om i Datuk Jasnih Daya i minomili’ minongiliu karaja’ Monguhup Montiri Kousinan montok manahak kosiwatan kumaa koposilihan tulun suai.
“Montok monuridong tinimungan di agaras, sinili ku i Datuk Haji Ruslan Muharam mantad PBS sabaagi Monguhup Montiri kumaa Boyoon Montiri, naamot di Peto Galim om i Tan Lee Fatt mantad Pakatan Harapan sopipoopori mongigit karaja’ sabaagi Monguhup Montiri Pomutanaman om Ponginsadaan om Monguhup Montiri Kousinan montok momoruhang kopoindalanan ‘inklusif’ di haro mantad,” ka disio.
Apat monguhup montiri di haro mantad i nokogompit id pinialanan portfolio nopo nga’ Dato’ Sri Dr. Ruddy Awah (Kopotundaan Labus Kakadayan), Datuk harun Durabi (Sains, Tiknologi om Inovasi), Datuk Fairuz Renddan (Komulakan om Spoot) om i Datuk Andy Suryadi Bandy (Kopotundaan Pomorunan. Io’ Ruddy dii Fairuz mantad GRS naamot io’ Harun dii Andi Suryadi mantad UMNO/BN.
“Pinosotol ku kosuulon montok koporintaan pogun id sahau buruanon ku do kapanau sabaagi iso’ tiim di ogirot i mi’ilang angkab di miagal tinuridong mantad kotumbayaan om kopurimanan sopipantang.
“Momoguno tokou tiim di agaras montok mongunsub waya’ kopotundaan tooku om montok monumboyo’ batos pomilian agayo tokou kumaa mogigiyon om pogun,” ka di Hajiji.
