Ewon Benedick
KOTA KINABALU: Komontirian Koburuon Mongungusaha’ om Koperasi (KUSKOP) masaan monorisid ponuridongan Kounsol Kopoburuan Mongungusaha’, Koperasi, Madaadagang om Mongindapu’ Okoro’ nayatan watas, id poliliput pogun (Malaysia).
Montiri dilo’, Datuk Ewon Ebin minoboros, ilo’ nopo nga’ wookon ponginsomokan wagu montok papagaras kopoindalanan kopoburuan mongungusaha’, koperasi, madaadagang om tongo’ mongindapu’ okoro’.
Ka disio kawagu, kounsol dilo’ kosili posunduran okon nopo ko’ manalasai hal pomolisinan nga nogi’ hal suai kapaampai kogogonopan koiyonon papadaadagang om mongingindapu’ okoro’ id watas id watas poliliput pogun.
“Mantad dilo’ pinaatag ku mooi do kounsol nayatan watas diti ponorikohon di upisor watas om monguhup upisor watas okoro’ sabab kaganaan kuasa’ karait do papadaadagang om mongingindapu’ okoro’ id sahau surupukaraja’ upis watas.
“Monotk mongulud kounsol diti, komontirian nga’ papaatag mooi do songintob geran kopoindalanan patahakon mitilombus kumaa upis watas montok tuduan dilo’,” ka disio minoboros id ababayan kopogompitan miampai tongo’ upisor watas om mongunguhup upisor watas poliliuput Sabah, id lintuhun mitingan Upis SKM Sabah, do hiti, di tadau baino’.
Ka di Ewon, montok papasaga’ komontirian poposodia’ kounsinan kopoburuan madaadagang om mongindapu’ sorokoro-koro’ poliliput pogun, kointalangan di tongo’ papadaadagang om mongingindapu’ id tikid watas kiguno posodiaon.
“Tuduan maganu kointalangan pinotomod tongo’ papadaadagang om mongingindapu’ sorokoro-koro’ id koiyonon ‘perkadaran’ toi labus perkadaran nopo nga’ montok papasaga’ komontirian mamalan bajet kopotundaan kaampai no tomu sandad id kampung do timpu dumontol. Iti wookon angkab ku i owiton ku kumaa Luguan Montiri om Kabinet Pisompuruan do tohuri.
“Gisom noondo komontirian kiharo no kointalangan maya’ Amanah Ikthiar Malaysia (AIM) om Tekun. Ilo’ no sabab do komontirian orohian misokodung miampai tongo’ upis watas id poliliput pomogunon montok tuduan diti,” ka disio.
Id ababayan kopogompitan dilo’ nga’, nakaakun nogi’ i Ewon di atag tongo’ upisor watas mooi do komontirian om oinsanan kotinanan komontirian manahak kopointalangan kumaa tongo’ upisor watas Sabah karait di skim ngaawi’ ababayan kopotundaan kousahawanan.
Kopointalangan kokomoi atag koyuon om kooturan Kounsol Kopoburuan Mongungusaha’, Koperasi, Madaadagang om Mongindapu’ Okoro’ nayatan Watas (MPUKPPD) pinatahak di Monunurat Bohogian Komontirian Koburuon Mongungusaha om Koperasi, Azizul Alias.
Nakaampai nogi’ id abbaayan kopogompitan dilo’ i Kumoduo Luguan Monunurat (Kopotundaan Kousahawanan) KUSKOP, Datuk Haji Zamri Salleh; Ponorikohon Eksekutif Suruhanjaya Koperasi Malaysia (SKM), Rusli Jaafar; Luguan Upisor Eksekutif Tabung Ekonomi Kumpulan Usaha Niaga (TEKUN), Dato’ Adam Abd. Ghani; Kumoduo Ponorikohon Eksekutf SKM, Datuk Umar Sarim Saidin; Potunud SKM Sabah, Matias Kundapin.
Nokotindapou nogi’ i Luguan Monguhup Monunurat (Kousahawanan Pomorunan Desa), Cornella han minongobi’ Monunurat Pointatap Komontirian Kopotundaan Labus Kakadayan (KPLB) Sabah, tongo’ upisor watas, mongunguhup upisor watas okoro’ Sabah om mongongobi’ kotinanan komontirian.
