Hajiji (poindikau, tanga’) miampai tongo’ PPM i kosisili.
KOTA KINABALU: Boyoon Montiri (KM), Datuk Seri Haji Hajiji Haji Noor minamason tongo’ Lansanon Koburuon Mogigiyon (PPM) mooi do popoindalan karaja’ diolo’ miampai poinponu’ tinonggungan tu’ yolo’ mongobi’ koporintaan pogun id kinoiyonon sompoopori.
Minoboros isio, PPM i poinsurupukaraja’ id kinoiyonon pembangkang, o kosuul no, poinsaan tonggungan di lobi kagayo montok mamagayat kotumbayaan rayat kumaa koporintaan pogun buruanon GRS (Gabungan Rakyat Sabah).
“Suai ko’ mananud ponuhuan koporintaan, tonggungan PPM id kinoiyonon pembangkang nopo nga’ kikaantaban. Yokoyu nopo nga’ mato om tolingo koporintaan. Poindalanon karaja’ miampai osonong,” ka disio katalib pinopoimagon ramai tuminaru fasa koduo montok 35 PPM, i kogumuan diolo’ pointorina’ id kinoiyonon pembangkang doid Menara Kinabalu, do hiti di tadau baino’.
Soginumu’ 45 PPM tuminaru karaja’ id ramai tumaru kumoinsan di ko 13tw Koiso’ katatalib.
“Mositi’ no dokoyu manamong kokitanan koporintaan. Kada’ pomonsoi haal montok koundaran sondiri’. Nung oilaan ku haro i momogusa’ koponsolon sondiri’ om monolikud rayat, amu’ oku bakangon do papataam diolo’. Kada’ sala’ guno kuasa nga’ manahak koposuulan kumaa diolo’ i otootopot momoguno ponguhupan,” ka disio.
Hajiji nga’ pinoposotol kawagu do PPM mositi’ popointalang id nayatan siriba’ karait di katatapan, inggisaman om naangayan koporintaan id siriba’ Sondikoton Sabah Maju Jaya (SMJ).
Nokotindapou nogi’ i tongo’ montiri kabinet om Potunud Unit PPM, Datuk Awang Kadin Tang.
