Jamawi (rulud toguang, tanga’) guminambar pongingitanan miampai di Maria (rulud toguang, kaapat gibang) om ilo suai doid Kompleks Ponginsadaan Likas.
KOTA KINABALU: Montiri Pomutanaman, Ponginsadaan om Pomournan Akanon Sabah, Datuk Jamawi Jaafar di tadau baino’ pinapaharo kotombuluyan karaja’ kuminaa Kompleks Ponginsadaan Likas.
Kinotombuluyan dilo’ kituduan minokinongou kopointalangan nogi’ minaganu kokitanan poinpuli di nuludan om tonggungan Koupisan Ponginsadaan Sabah, suai ko’ mongilo kobolingkahangan om mogihum panalasaian montok mongingkawas naangayan surupukaraja’ koupisan dilo’.
Jamawi (toguang) minokinongou kopointalangan di maso id Makmal PCR om Makmal Autopsi montok minintong kopokitanan kakamot makmal do mongintutun tomporuruol sada’.
Id kinotombuluyan dilo’, i Jamawi nonuan kointalnagan di Potunud Ponginsadaan Sabah, Datin Dr. Shuhada Mustapha om Monguhup Potunud Totuo Biosekuriti, Matlan @ Abdul Rahim Thaufeck id Pisuk Mitingan Agayo.
Nokotindapou nogi’ i Kumoduo Monunurat Pointatap II komontirian, Maria David Edick.
Id boboroson disio, pinosotol di Jamawi angkab komontirian montok popoimogigiyon surupukaraja’, kohondot dilo’ oinsanan kotinanan id siriba’ komontirian nuru’ popoindalan tonggungan dilo’ do poinpuli.
Pinopoilo nogi’ isio do sitaf id tolu kotinanan agayo ilo’ nopo nga’ Koupisan Ponginsadaa, Kotinanan Komogoton Sada Malaysia (LKIM) om SAFMA amu’ mogisasahap, nga’ sopigonop id tiso’ om tiso’ mooi do tonggungan om karaja di poindalanon kapanahak koundaran bobos ogumu’ kumaa rayat.
Jamawi (wanan) minokinongou kopointalangan montok pokikitanan mongintutun sada’ i ginambit minomoguno kakamot poloputon.
Jamawi minokianu nogi’ Koupisan Ponginsadaan do poposodia’ kogugunoon miagal bibit sada om ‘input’ poinhompit montok monokodung kopoindalanan ababayan Jelajah Kebun Dapur i maan poindalano’ posusuhut diti.
Id ababayan sopisuai, i Jamawi miampai Monunurat Pointatap Komontirian, Datuk Leonard Stephen Poyong, tuminindapou mitingan Koperasi Komontirian Pomutanaman om Pomorunan Akanon Malaysia (KOTANI).
