Jamawi (gibang) miampai sawo pinaparaat taakanon kumaa tombului di nokorikot.
TENOM: Montiri Pomutanaman, Ponginsadaan om Pomorunan Akanon, Datuk Jamawi Jaafar pinoposotol tonggungan ogirot dau montok monguhup mogigiyon labus kakadayan kosuul no id DUN Melalap.
Isio i po nogi’ Puru Dewan Koundangan Pogun (ADUN) Melalap minoboros, tingkananon nopo disio nga’ poposimbuat bantug om kasasanangan mogigiyon momutanom, momukabun okoro’ om nogi’ monginginsada’ i kogumuan diolo’ poingampai id tinimungan B40.
Minonongkounsikou nogi isio kumaa oinsanan mongungundi’ id watas Melalap i minanahak dau kotumbayaan sabaagi mobi’ rayat montok limo toun obontol diti.
Jamawi (kaapat, gibang) guminambar miampai di Rubin (kaapat, wanan), Riduan (koduo, gibang) om nogi’ ilo suai.
“Noondo no timpu montok kumaraja’ kumaa oinsanan rayat id koiyonon Tenom om Melalap. Mantad dilo’, aiso’ nodi komoyon do, isai minukung disai, isai minongundi disai, noondo do timpu kumaraja’ montok monguhup rayat do oinsanan,” ka di Jamawi.
Sinuau po nogi’ disio kinorikotand i Montiri Koburuon Labus Kakadayan i po nogi’ ADUN Kemabong, Datuk Rubin Balang om Puru Parlimen Tenom i po nogi’ Ponorikohon Kotinanan Harta Intelek Malaysia (MyIPO), Riduan Rubin.
Jamawi (poindikau) guminambar miampai puru paganakan dau i nokotindapou nogi’ minamaramai Walai Poingukab Natal DUN Melalap.
“Ogumu’ po tongo’ ababayan, lolobi no id koiyonon poonsokid, id Tenom om id Kemabong. Gumura’ tokou miampai oirus mooi do kaanu minggisom di bobos osonong montok koiyonon tokou, ingkaa nogi’ montok pogun tokou,” ka di Jamawi.
“Tadau baino oinsanan mamaramai tokou do Natal amu’ monutun ugama om sinakagon…. Patahak oku surupukaraja di bobos osonong om popoboros koinsanai kogugunoon DUN Melalap id Dewan Undangan,” ka disio ontok pinopoimagon Walai Poingukab Natal DUN Melalap 2025 id Lintuhun Datuk Sanggau Jalang, do hiti, di konihab.
Ka disio, pogulu po do nokoigit karaja’ nga’ nakahabar no disio karalanon montok popogoris inggisaman konsep ‘Kebun Dapur’ sabaagi karalanon posonong koposion poinbobos ginumu’ mogigiyon.
“Orohian oku mongukab liwang om kosiwatan do poinggayo kumaa tulun kampung tokou do gumompit id kaparagatan pomutanaman doid kinoiyonon walai sondiri miampai kos osiriba’… Insya’Allah, poimpuunon tokou do kolimpuunon toun tiso’,” ka disio.
“Okito ku ogumu’ i maan tokou umbalai do minggisom montok monguhup rayat tokou mogowit lobi kogumu’ kopoobian om nogi’ mogowit lobi kogumu’ komogoton kopohompit do pomutanaman, kopohompit do ikonomi montok sukod wagu om kopohondot di kogunoon ralan-ralan pomutanaman.
Jamawi guminambar pongingitanan miampai tombului di nokotindapou.
“Muumudahan, sundung toun tiso’ kopoobian amu’ i doti’ ogumu’, nga’ lumansan tokou mooi do kapapanahan kopogulian 40% sukai kumaa Sabah i masaan pohimogonon do koporintaan pogun om nogi’ koporintaan Pisompuruan kouhup lobi kogumu’, momutanom, momutayam, monginsada’ om nogi’ mongingindapu’ pomorunan akanon mooi do kaanu tokou popoburu’ miampai ralan di lobi kosonong,” ka di Jamawi.
Minongomi sunduan kararamaian, ka disio, Krismas koowit pason poinpuli karait do pilisihan, pomoromitan om kopogiagalan i osomok kopio id ginawo rayat Sabah i mogisuai koubasanan om kotumbayaan.
“Ramai miagal diti okon ko’ kararamaian nopo, nga’ liwang montok mogi’intutun-tutun miampai lobi koronit, monginggirot piromutan om mamagatang pisuayan sabaagi iso’ ginaras koinsanai,” ka disio.
Lumansan isio dumontol 2026, sunduan piombolutan kotilombus koinggirot montok papatantu’ palan om ababayan komontirian aanu popoindalan miampai lobi kiwaya’.
Jamawi miampai sawo Datin Zainatunnisa Ibrahim minamason Kounsikahan Tadau Natal 2025 om Kopisanangan Mamaramit Toun Wagu2026 kumaa oinsanan rayat DUN Melalap.
Nokotindapou nogi’, ADO Watas Okoro’ Kemabong, Zakaria Jamal; Luguan Watas Tenom, OKK Tusib Tulas om nogi’ Puru ngaawi’ Kounsol Watas Tenom om lansanon nokoiyonon DUN Melalap.
