Steve Johnny Mositun
KOTA KINABALU: Bohogian kikuasa’ unsubon popoindalan ponoriukan poinpuli kohondot kinaantakan nokotonu’ id kinoiyonon ginumuan Tanjung Lipat i nakapaampai duo tulun rinakam minomonsoi koulalaho’ di amu’ apatut id koiyonon ginumuan.
Kumoduo Presiden Kelab Komuniti Sayang Sabah, Steve Johnny Mositun minoboros, kaantakan dilo’ kopotongob mogigiyon tu’ winonsoi do poingukab amu’ minomoduli’ kinoubasanan sosial, kaadaton om kopurimanan ginumuan.
“Koiyonon ginumuan okon ko’ liwang sondiri’, om Sabah amu’ apatut kosili koiyonon do popologos pogogoyuon i atalang do pasansala’ mantad kaadaton, kinoubasanan om pogogoyuon doun kosilahon (nilai ketimuran),” ka disio id iso’ kointalangan.
Pinosotol disio do kosimbayanan sosongulun amu’ aanu pasansalon pamarati gisom kapanagak bantug tinan om kotoronongon mogigiyon.
“Kosimbayanan okon ko’ lisin do atagakan bantug. Kopotutan sosongulun nga’ amu’ aanu silihon padaahan do paparama’ pinurimon mogigiyon ginumuan,” ka disio.
Minoboros isio, bohogian kikuasa’ nuru’ popoindalan ponoriukan miampai aadang om osorisid nogi’ maganu laang poinpatut nung oilaan no do naantakan kinoponohuban undang-undang.
“Laang nuru’ onuon okon nopo ko’ kumaa tulun di nokohompit, nga nogi’ i minamarakam om pinopotonu’ rakaman dilo’ nung kapanahub no ilo’ do undang-undang di poinharo mantad,” ka disio.
Steve pinoposorou nogi’ do koyuon kumadaada’ om mongomi haal diti sabaagi iso’ i noubasanan koowit kumaa katagakon gatang moral id timpu anaru.
“Nung baino’ diti komoyon tokou haal diti do aiso nunu-nunu, kada’ kotigowo soira’ insan tadau somonu’ haal i pogulu diti komoyon do kosusuayan kosili kinoubasanan id mogigiyon,” ka disio.
Pinokianu po nogi’ disio oinsanan boogian do momogompi’ gatang kinoulunon, kaadaton om tonggungan sosial montok timpu dumontol sakag obontol.
“Manamong Sabah okon ko’ karait nopo koburuon poinginan, nga nogi’ momogompi’ gatang om bantug mogigiyon dau,” ka disio.
