Jamawi (koduo, gibang) kuminakap sinuusulap ngaawi’ padadagangan durian om tinanud di sawo dau, Datin Zainatunnisa Ibrahim (koduo, wanan).
KOTA KINABALU: Montiri Pomutanaman, Ponginsadaan om Pomorunan Akanon, Datuk Jamawi Jaafar, minoboros, Brosur Agropelancongan “Pengalaman Ladang Sabah yang Unit 2026-2027” (Jilid 2) kikogunaan sabaagi ‘road map’ wagu montok popointutun ponombuluyan labus kakadayan Sabah.
Minoboros isio, brosur diti okon ko’ ‘risalah’ nopo tomod, nga’ puralan poinpuli i koporomut tutumombului miampai intodon koposion otopot do siktor pomutanaman pogun.
Maya’ koposolimbahand iti, tutumombului suang pogun om sompomogunan kikosiwatan sumuang lobi kosogu’ mantad kakadayan om tisan rahat, kaampai tumombului kabun, rumuba’ momumutanom om mongilo koposion labus kakadayan i nosili kointutunan Sabah.
Jamawi (kaapat, wanan) minongigit brosur ‘Agropelancongan Vol.2 (2026-2027)’ om guminambar pongingitanan miampai tombului naalap i nokotindapou.
“Kinoposolimbahan diti kouhup posuni pamagatangan lobi poinralom kumaa intodonon akanon om asil pomutanaman pogun, potilombus dino kopongimbulai nawawaya’an pamanahan di lobi kirati,” ka disio ontok pinopoimagon Bazar Ponombuluyan Durian Sabah 2025 id Lintuhun Dking, Pointingisan Waig Segama, do hiti di konihab.
Ka di Jamawi, brosur diti nga’ kosili nogi’ do ‘platform’ kopointutunan oponsol montok momumutanom om monngingindapu’ agro tu’ kopongukab waya’an kumaa pidagangan wagu nogi’ kapanahak nindopuan ogirot maya’ siktor ponombuluyan.
Jamawi (gibang) minanahak kopointalangan kuminaa di Dr. Sabin.
Minonongkounsikou isio kumaa Koisaan Mananamong Durian om Tuwa’ Tropika Sabah (MaSDa), Tourism Malaysia Sabah, Sabah Tourism om FAMA Sabah mantad kouhupan i kopokito pisokodungan id pialatan pomutanaman om ponombuluyan kaanu mogowit asil nokoiyonon kumaa nayatan global.
Montiri dilo’ minokianu oinsanan watas, koisaan pomutanaman om popoburu’ pomorunan ponombuluyan do monginggumu’ asil agroponombuluyan koimbayat tumanud ginaras kinoiyonon sompoopori.
“I potuu tana’ tidong Kundasang, kabun koko id Tawau toi kampung monginsada’ id Tisan Kosilahon, tikid kinoiyonon kiharo susuyan om nawawaya’an poinpoopori i aanu pokitanan kumaa pomogunan,” ka disio.
Jamawi (tanga’) pinopokito tanda’ ‘osonong’ om minongigit brosur Agropelancongan miampai dilo suai.
Jamawi nga’ minongunsub nogi’ tutumombului momuriman sondiri’ kinolumison asil pomutanaman pogun om mamagatang inggisaman mororobuat i minogowit asil bobos osonong diolo’ kuminaa bazar.
Otumbayaan isio timpu dumontol agroponombuluyan Sabah anawau om poinponu’ kosiwatan, potilombus dino mokianu oinsanan bohogian sumili mananamong tana’ ngoi’ tungkusan pomutanaman.
Ababayan dilo’ rinamai miampai kinorikotan tambalut pomorunan, mongindapu’, momutanom MaSDa nogi’ tongo’ mongongobi’ kotinanan ponombuluyan om media.
Nokotindapou nogi’ i Monguhup Montiri II, Datuk Hendrus Anding, Monunurat Pointatap Komontirian, Datuk Leonard Stephen Poyong; Mayor DBKK, Datuk Seri Dr. Sabin Samitah; Potunud Koupisan Pomutanaman Sabah, Datuk Jifrin Mohamad; Kumoduo Potunud FAMA Sabah om Watas Pisompuruan, Sebastian Chew; Luguan Upisor Eksekutif Kotinanan Ponombuluyan Sabah (STB), Julinus @ Jeffrey Jimit; Potunud Bohogian Koburuon Pakej Tourism Malaysia, Zuraini Abdul Ghani; Potunud Agrotourism MaSDa po nogi’ Ponorikohon Manganganjur, Johnny Ting.
